Qaraqalpaqstan Respublikası Joqarǵı Keńesi Baslıǵınıń tapsırmasına muwapıq Shomanay rayonında úyreniw jumısları alıp barılmaqta

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shomanay rayonınıń sociallıq-ekonomikalıq jaǵdayı, rayonda búgingi kúnde xalıqtıń abadan turmısın támiyinlew baǵdarındaǵı jumıslar menen tanısıw maqsetinde rayonda bolıp, bir qatar kemshiliklerdi sınǵa alǵan edi. Joqarǵı Keńes Baslıǵı Amanbay Orınbaevtıń tapsırması menen Shomanay rayonında mámleketlik baǵdarlamalardıń orınlanıwın támiyinlew hám berilgen tapsırmalardı qadaǵalap barıw ushın Qaraqalpaqstan Respublikası Oraylık saylaw komissiyası baslıǵı E.Djumanazarovtı Shomanay rayonına juwapker etip bekitilgen. Respublikamız basshısı tárepinen berilgen tapsırmalardıń orınlanıwın támiyinlew maqsetinde E.Djumanazarov tárepinen Shomanay rayonında bir qansha úyreniw jumısları alıp barılmaqta. Dáslep Shomanay rayonı Qarabaylı mákan puqaralar jıyını aymaǵındaǵı jańadan qurılıp atırǵan 32-sanlı mektep imáratı, jańadan boy tiklep atırǵan kitapxana, monsha hám jasıl qaplamalı kishi futbol maydanshalarınıń qurılıs jumısları kórip shıǵılıp, qurılıs jumısların jedellestiriw boyınsha juwapkerlerge tapsırmalar berildi. Sonday-aq, rayon orayındaǵı Mádeniyat bólimi imáratınıń qurılısı, Aq jap APJ aymaǵındaǵı mektepke shekemgi bilimlendiriw shólkemi, Sarmanbaykól APJ aymaǵındaǵı turǵınlardıń eń awrıwlı mashqalası bolǵan Respublikalıq áhmiyetke iye 4R-177 avtomobil jolınıń 28,9-km.de jaylasqan kópirdiń qurılıs jumısların Joqarǵı Keńes Baslıǵı tárepinen belgilengen múddette sapalı etip juwmaqlaw ilajları kórilmekte. Maǵlıwmat ornında aytıp ótiw orınlı, Sarmanbaykól APJ aymaǵındaǵı 4R-177 avtomobil jolınıń 28,9-km.de jaylasqan kópirdi hám joqarıda keltirilgen múddeti keshikken qurılıs obektlerin Qaraqalpaqstan Respublikası Joqarǵı Keńesiniń Baslıǵı Amanbay Orınbaev usı jıldıń 16-sentyabr kúni Shomanay rayonına bolǵan saparı dawamında jeke ózi barıp kórip, juwapkerlerge qısqa múddette juwmaqlaw boyınsha wazıypalardı belgilep bergen edi.

Qaraqalpaqstan Respublikası Joqarǵı Keńesiniń Málimleme xızmeti