Búgin Qanlıkól rayonında Taqıyatas, Xojeli, Qanlıkól, Shomanay, Qońırat hám Moynaq rayonları puqaraları ushın Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń jeke qabıllawı bolıp ótti. Onda Ózbekstan Respublikası Prezidenti keńesgóyiniń birinshi orınbasarı U.Muxammadiev qatnastı. Bolıp ótken qabıllawda Joqarǵı Keńes Baslıǵınıń jeke qabıllawına jazılǵan dizim boyınsha puqaralardıń múrájatları tıńlanıp, ornında sheshim tabıw ilajları kórildi.

Qabıllawda tiykarınan puqaralardı qıynap kiyatırǵan mashqalalar qatarında, sociallıq qollap-quwatlaw, bántlik, medicinalıq járdem, jol, ishimlik hám aqaba suw, elektr hám gaz támiynatı, isbilermenlik iskerliginde ushırasıp atırǵan mashqalalar boyınsha múrájatlar bildirildi.

Aytıp ótiw orınlı, qabıllawda jámi 433 múrájat kelip túsken bolıp, sonnan 200 ge shamalas mashqala derlik teń 50 procenti ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Máselen Qanlıkól rayonınan Torıbaev Ulıgbektıń bildirgen múrájatı sol orınnıń ózinde unamlı sheshimin tawıp, kóshesine jańadan elektr liniyasın tartıw jumısları baslap jiberildi. Moynaq rayonı Mádeli APJ Porlıtaw awılı puqarası Japarov Jadigerdiń Porlıtaw awılın gaz benen támiyinlew boyınsha múrájatı unamlı sheshilip, jámi 8.2 km uzınlıqtaǵı gaz liniyasın tartıp beriw hám 200 den aslam xojalıqtı qayta gazge jalǵaw jumısları kúnniń ózinde baslap jiberildi. Xojeli rayonınan Bakieva Muxabbat hám Jadigerova Nasibalardıń kontrakt pulların tólep beriw boyınsha múrájatları unamlı sheshilip, tólemli-shártnama pulların ótkerip beriw boyınsha tapsırma berildi. Taqıyatas rayonınan Eshmuratov Tolıbay kóshesi ońlawǵa mútájligi boyınsha murájat etip, Joqarǵı Keńes Baslıǵı tapsırması menen 1 hápte múddet ishinde kóshesine qum-щeben aralaspası (ЩPS) tósep beriletuǵın boldı. Sonday-aq, Qońırat rayonınan Zarekeeva Zamiranıń múrájatı boyınsha úyiniń shiferi bastırıp beriliwi hám Yusupov Azattıń múrájatı boyınsha úyiniń ishine pol tóselip, ońlap beriw belgilengen bolsa, Shomanay rayonınan Jamalov Abilqasımnıń jumıssızlıǵı boyınsha múrájatına tiykar rayondaǵı 3-sanlı mektepke jumısqa qabıl etildi. «Insan qádiri ushın» principi tiykarında jolǵa qoyılǵan bunday qabıllawlar puqaralar turmısında ushırasıp atırǵan hám olardı qıynap kiyatırǵan mashqalalarǵa sheshim tabıwda sonıń menen birge xalqımızdı búgingi kúninen kewilli jasawı jolında jáne bir ámeliy jumıslardıń dáliyli boladı. Qaraqalpaqstan Respublikası Joqarǵı Keńesi Baslıǵınıń jeke qabıllawları orınlarda dawam ettiriledi.

Qaraqalpaqstan Respublikası Joqarǵı Keńesiniń Málimleme xızmeti