Qaraqalpaqstan Respublikası Joqarǵı Keńesi Baslıǵınıń tapsırmasına muwapıq Moynaq rayonında úyreniw jumısları alıp barılmaqta

Qaraqalpaqstan Respublikası Joqarǵı Keńesiniń Baslıǵı Amanbay Orınbaev usı jıldıń 23-sentyabr kúni Moynaq rayonınıń sociallıq-ekonomikalıq jaǵdayı, rayonda búgingi kúnde xalıqtıń abadan turmısın támiyinlew baǵdarındaǵı jumıslar menen tanısıw maqsetinde rayonda bolıp, bir qatar kemshiliklerdi sınǵa alǵan edi. Joqarǵı Keńes Baslıǵı Amanbay Orınbaev Moynaq rayonında mámleketlik baǵdarlamalardıń orınlanıwın támiyinlew hám berilgen tapsırmalardı qadaǵalap barıw ushın Qaraqalpaqstan Respublikası Joqarǵı Keńesi Baslıǵınıń áskeriy máseleler boyınsha keńesgóyi B.Ajiniyazovtı juwapker etip bekitken edi. Respublikamız basshısı tárepinen berilgen tapsırmalardıń orınlanıwın támiyinlew maqsetinde B.Ajiniyazov tárepinen Moynaq rayonında bir qansha úyreniw jumısları alıp barıldı. Dáslep Moynaq rayonı «Qızıl jar» awıl puqaralar jıyını aymaǵındaǵı jańadan qurılıp atırǵan medicinalıq kontiner, «Mádeli» awıl puqaralar jıyını aymaǵındaǵı jańadan boy tiklep atırǵan balalar baqshası, máhállelerdegi jasıl qaplamalı kishi futbol maydanshalarınıń qurılıs jumısları kórip shıǵılıp, qurılıs jumısların jedellestiriw boyınsha juwapkerlerge tapsırmalar berildi. Sonday-aq, rayon orayındaǵı «Moynaq» mákan puqaralar jıyını aymaǵındaǵı jańadan qurılıp atırǵan máhálle imáratınıń qurılısı, «Jayxun» MPJ aymaǵındaǵı hám «Tallı-ózek» MPJ aymaǵındaǵı piyadalar jolınıń qurılıs jumısların Joqarǵı Keńes Baslıǵı tárepinen belgilengen múddette sapalı etip juwmaqlaw ilajları kórilmekte.

Qaraqalpaqstan Respublikası Joqarǵı Keńesiniń Málimleme xızmeti