Qaraqalpaqstan Respublikası Joqarǵı Keńesiniń Baslıǵı tárepinen Tórtkúl rayonında ótkerilgen májiliste berilgen tapsırmalardıń orınlanıwı úyrenilmekte

Qaraqalpaqstan Respublikası Joqarǵı Keńesiniń Baslıǵı Amanbay Orınbaev usı jıldıń 22-sentyabr kúni Tórtkúl rayonınıń social-ekonomikalıq jaǵdayı hám aymaqta alıp barılıp atırǵan keń kólemli dóretiwshilik-abadanlastırıw jumısları menen tanısıw maqsetinde rayonda bolıp, bir qatar kemshiliklerdi sınǵa aldı. Joqarǵı Keńes Baslıǵı Amanbay Orınbaev Tórtkúl rayonında mámleketlik baǵdarlamalardıń orınlanıwın támiyinlew hám berilgen tapsırmalardı qadaǵalap barıw ushın Qaraqalpaqstan Respublikası Joqarǵı Keńesiniń Apparatı Yuridikalıq bólimi baslıǵı A.Atajanovtı Tórtkúl rayonına juwapker etip bekitken edi. Joqarǵı Keńes Baslıǵı tárepinen berilgen tapsırmalardıń orınlanıwın támiyinlew maqsetinde A.Atajanov tárepinen Tórtkúl rayonında úyreniw jumısları alıp barılmaqta. Dáslep, 2022-jılda qurılıs-ońlaw jumısları belgilengen “Tashkent” puqaralar jıyını aymaǵındaǵı 260 orınlıq 26-sanlı mektepke shekemgi bilimlendiriw mákemesi imáratı, 2023-jılda qurılıwı belgilengen 2000 orınlıq Amfiteatr, Jaslar orayı imaratın, 8-sanlı mektep ushın 660 orınlıq, medicina birlespesiniń tuwıw bólimi ushın 100 orınlıq qosımsha imarat qurıw boyınsha jer orınların anıqlaw jóninde jumıslar úyrenildi hám juwapkerlerge tapsırmalar berildi. Qaraqalpaqstan Respublikası Joqarǵı Keńesiniń Baslıǵı Amanbay Orınbaev tárepinen rayonda bántlik máselesi de sınǵa alınǵan edi hám bul boyınsha Tórtkúl rayonı bántlikke kómeklesiw bólimi tárepinen bir neshe awıl hám mákan puqaralar jıyınlarınıń jumıssız puqaraları ushın 6-7-oktyabr kúnleri bos jumıs orınları miynet yarmarkası shólkemlestirilip, 62 puqaraǵa jumısqa jaylasıw ushın jollamalar berildi. Sınǵa alınǵan transport xızmeti boyınsha mashqalanı sheshiw maqsetinde Transport ministrligi hám Qaraqalpaqstan Respublikası Ishki isler ministrligi JHQB qániygelerinen ibarat  isshi-topar tárepinen Tórtkúl rayonında qospa reyd ilajları ótkerildi hám ózlerine belgilengen sxema tiykarında háreketleniwine ámel etpegen hám nızamsız jolawshı tasıw xızmeti menen shuǵıllanıp kelgen 21 avtotransport basqarıwshılarına hákimshilik huqıqbuzarlıq haqqında bayanlamalar rásmiylestirildi. Sonıń menen birge rayondaǵı jolawshı tasıw menen shuǵullanıwshı kárxanalarda islewshi 56 xızmetkerdiń 2022-jıldıń 8 ayı dawamında esaplanbastan qalǵan jeke puqalardıń dáramat salıǵın óndiriw boyınsha da is-ilajlar kórilmekte.

Qaraqalpaqstan Respublikası Joqarǵı Keńesiniń Málimleme bólimi