Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qanlıkól rayonında boldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qanlıkól rayonında xalıqtıń abadan turmısın támiyinlew hám rayonnıń sociallıq-ekonomikalıq jaǵdayın jaqsılaw baǵdarında alıp barılıp atırǵan jumıslar menen tanısıw maqsetinde rayonda boldı. Dáslep Joqarǵı Keńes Baslıǵı Qanlıkól rayonı aymaǵında jańadan boy tiklep atırǵan «Jańa Ózbekstan» turaq-jay massivi qurılısı menen jaqınnan tanıstı. Aytıp ótiw orınlı, Qanlıkól rayonındaǵı «Nawrız» awıl puqaralar jıyını aymaǵınan 14,3 gektar jer maydanında 300 kvartiralı 10 turaq jay, 1 ulıwma bilim beriw mektebi, 1 mektepke shekemgi bilimlendiriw shólkemin qurıw belgilengen bolıp búgingi kúnde qurılıs jumısları dawam etpekte. Joqarǵı Keńes Baslıǵı tárepinen qurılıs jumısların jedellestiriw hám sapalı ámelge asırılıwın turaqlı qadaǵalap barıw boyınsha tiyisli taraw wákillerine tapsırmalar berildi. Bunnan soń Qaraqalpaqstan Respublikası Joqarǵı Keńesiniń Baslıǵı Amanbay Orınbaev barlıq ministrlik, komitet, basqarma, shólkem basshıları hám rayonlıq mákemelerdiń baslıqları sonday-aq, Qanlıkól rayonınıń belsendileri, kárxana hám shólkem basshıları qatnasıwında májilis ótkerdi.

Sóziniń basında Joqarǵı Keńes Baslıǵı búgingi kúnde elimizde «Insan qádiri ushın» principinde ámelge asırılıp atırǵan reformalar, qurılıs hám abadanlastırıw, úlken dóretiwshilik jumıslarına toqtalıp ótti. Sonıń menen birge Qanlıkól rayonında da bul baǵdardaǵı keń kólemli jumıslar dawam ettirilip atırǵanlıǵın atap ótip, bunda ayırım taraw basshıları tárepinen óz jumısına nemquraylıq penen qaraw háreketleri hám jol qoyılıp atırǵan qáte-kemshiliklerin sınǵa aldı. Ótkerilgen májiliste Qaraqalpaqstan Respublikası Joqarǵı Keńesiniń Baslıǵı byudjet qarjılarınıń maqsetsiz jumsalıwı, mámleketlik byudjetten ajıratılǵan qarjılar boyınsha finanslıq qáte-kemshiliklerge jol qoyılǵanlıǵı, mámleketlik uyımlar xızmetkerleriniń ózlerine júkletilgen wazıypaların talap dárejesinde orınlamay atırǵanlıǵı, sektorlar jumısı qanaatlandırarsız ekenligi, mektepke shekemgi hám ulıwma orta bilim beriw, medicina, sociallıq qollap-quwatlaw sıyaqlı bir qatar tarawlarda jol qoyılıp atırǵan qate-kemshiliklerge toqtap ótti.  

Joqarıdaǵılar menen bir qatarda, rayondı sociallıq-ekonomikalıq rawajlandırıw baǵdarında belgilengen rejelerdiń orınlanıwınıń keshiktiriliw jaǵdayları, rayonnıń eksport potenciyalınan tolıq paydalanbaw, isbilermenlikti rawajlandırıw baǵdarındaǵı kemshilikler, jumıssızlıqtı qısqartıw baǵdarındaǵı, mámleketlik baǵdarlamalar hám Prezident saparı dawamında berilgen tapsırmalardıń orınlanıwındaǵı artta qalıwlar da sınǵa alınıp, tiyisli taraw wákillerine tapsırmalar berildi. Qaraqalpaqstan Respublikası Joqarǵı Keńesiniń Baslıǵı Amanbay Orınbaev rayondaǵı alıp barılıp atırǵan jumıslardı hám berilgen tapsırmalardıń orınlanıwın támiyinlew ushın Qaraqalpaqstan Respublikası Oraylık saylaw komissiyası baslıǵı E.Djumanazarovtı Qanlıkól rayonına juwapker etip bekitti. Májilis juwmaǵında bıyılǵı jıl juwmaǵına shekem rayondı sociallıq-ekonomikalıq jaqtan rawajlandırıw hám xalıqtıń abadan turmıs keshiriwin támiyinlewge jámi 9 mlrd. 891 mln.swmlıq qarjı ajıratılatuǵınlıǵı atap ótildi.  

Qaraqalpaqstan Respublikası Joqarǵı Keńesiniń Málimleme xızmeti