Ózbekstan – Saudiya Arabstanı: parlamentler aralıq birge islesiw bekkemlenedi
1354
Ózbekstan Respublikası Oliy Majlisi Senatınıń baslıǵı Tanzila Norboeva Saudiya Arabstanı Patshalıǵınıń Ózbekstan Respublikasındaǵı Ayrıqsha hám tolıq huqıqlı elshisi Yusuf bin Solih al-Utaybiy menen ushırastı.
T.Norboeva Yusuf al-Utaybiydi Saudiya Arabstanı Patshalıǵınıń Ózbekstandaǵı Ayrıqsha hám tolıq huqıqlı elshisi lawazımına tayınlanǵanı jáne elimizde diplomatiyalıq missiyasın baslaǵanı menen qutlıqladı.
Sóylesiw waqtında Ózbekstan Respublikası Prezidenti Shavkat Mirziyoevtiń Eki muqaddes meshit xızmetkeri – Saudiya Arabstanı Patshası Salmon bin Abdulaziz Ol Saudtıń mirát etiwine bola usı jıldıń 17-18-avgust kúnleri bul mámleketke ámelge asırǵan mámleketlik saparı eki tárepleme qatnasıqlarda birge islesiwdi sapa jaǵınan joqarı basqıshqa kótergeni ayrıqsha atap ótildi.
Ushırasıwda Ózbekstan hám Saudiya Arabstanı arasındaǵı sawda-ekonomikalıq hám mádeniy-gumanitarlıq baylanıslardı jáne de keńeytiw máseleleri boyınsha pikir alısıldı.
Eki tárepleme qatnasıqlardıń rawajlanıwında parlamentler aralıq baylanıslar áhmiyetli faktor ekeni, bul baǵdarda mámleketlerimiz parlamentlerinde shólkemlestirilgen doslıq toparları arasındaǵı óz-ara birge islesiwdi jáne de jedellestiriw hám ámeliy nátiyjeler menen bayıtıw zárúr ekenligi atap ótildi.
Bul boyınsha óz-ara tájiriybe almasıw, hár qıylı dárejedegi delegaciyalar saparların turaqlı shólkemlestiriw, sonday-aq, parlamentlerdegi komitetler arasında baylanıslardı jolǵa qoyıwǵa kelisip alındı.
Qaraqalpaqstan Respublikası Joqarǵı Keńesiniń Málimleme xızmeti