Astanada Aziyada birge islesiw hám isenim ilajları keńesiniń májilisi baslandı
1598
Qazaqstan paytaxtı Astana qalasında Aziyada birge islesiw hám isenim ilajları keńesiniń altınshı sammiti óz jumısın basladı.
Aldın usı mámleket sırtqı isler ministrliginiń rásmiy wákili Aybek Smadiyarov gezektegi ánjuman 50 ge shamalas delegaciya wákilleri bir orınǵa jıynalatuǵının málim etken edi.
Qazaqstan basshılıq etip atırǵan joqarı dárejedegi gezektegi ushırasıw ABIKti shaqırıw baslamasınıń 30 jıllıǵına tuwra keldi. Sammitke aǵza hám baqlawshı mámleketler, shólkemler, birge islesiwshi strukturalardıń jetekshileri mirát etilgen.
Aziya keńesi sammiti pandemiyadan keyingi dáwirde regiondaǵı eń iri siyasiy ilajlardan birine aylanıwı kútilmekte. Ilaj dawamında, sonıń ishinde, Qazaqstan basshılıǵındaǵı eki jıllıq jumıs juwmaǵı shıǵarıladı.
11 mámleket basshısı qatnasatuǵın sammit dawamında bir qatar hújjetlerge qol qoyılıwı, qararlar qabıl etiliwi rejelestirilgen.
Qaraqalpaqstan Respublikası Joqarǵı Keńesiniń Málimleme xızmeti