Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetiniń májilisi ótkerildi
1613
Qaraqalpaqstan Respublikası Joqarǵı Keńesiniń 2022-jıl 21-iyundaǵı 33-sessiyasında huqıqbuzarlıqtıń aldın alıw hám olardıń profilaktikası jaǵdayı haqqındaǵı Qaraqalpaqstan Respublikası Ishki isler ministriniń esabatı tıńlanıp, tiyisli qarar qabıl etilgen edi.
Usı sessiya qararında berilgen tapsırmalardıń orınlanıwın támiyinlew maqsetinde Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetiniń májilisi ótkerildi.
Májilisti Qaraqalpaqstan Respublikası Joqarǵı Keńesiniń komitet baslıǵı Z.Reymova kiris sóz benen ashıp berdi. Soń Qaraqalpaqstan Respublikası Ishki isler ministrligi tárepinen respublika aymaǵında 2022-jıldıń 9 ayında huqıqbuzarlıqtıń aldın alıw hám olardıń profilaktikası jaǵdayı haqqında Qaraqalpaqstan Respublikası Ishki isler ministri orınbasarınıń esabatı, Ózbekstan Respublikası Prezidentiniń 2021-jıl 21-noyabrdegi «Ózbekstan Respublikasınıń jámiyetlik qáwipsizligi koncepciyasın tastıyıqlaw hám onı ámelge asırıw ilajları haqqında»ǵı 27-sanlı Pármanında belgilengen jámiyet qáwipsizligin támiyinlewshi subektler tárepinen ámelge asırılǵan jumıslar hámde Ózbekstan Respublikası Prezidentiniń «Avtomobil jollarında insan qáwipsizligin isenimli támiyinlew hám ólim jaǵdayların keskin kemeytiw is-ilajları haqqında»ǵı 190-sanlı Qararına muwapıq aymaqlıq komissiyasınıń esabatı tıńlandı.
Májiliske Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetine aǵza deputatları menen birge Qaraqalpaqstan Respublikası Ministrler Keńesi, Qaraqalpaqstan Respublikası prokuraturası, Ishki isler ministrligi hám basqa da tiyisli taraw wákilleri qatnastı.
Onda kún tártibindegi máseleler tolıǵı menen qarap shıǵıldı. Sonıń menen birge Koncepciya boyınsha jámiyet qáwipsizligin támiyinlew wazıypaları belgilengen tiyisli mámleketlik uyımlardıń búgingi kúndegi jumısları sın kóz qarastan dodalanıp, komitettiń tiyisli sheshimi qabıl etildi.
Atap ótilgen másele boyınsha usınıslar berilip, bul jumıslardıń aldaǵı waqıtta qatań qadaǵalawǵa alınıp, hár sherek juwmaǵı menen turaqlı túrde Joqarǵı Keńes tárepinen kórip shıǵılatuǵınlıǵı atap ótildi.
Qaraqalpaqstan Respublikası Joqarǵı Keńesiniń Málimleme xızmeti