Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń eń shetki aymaqlarınıń biri bolǵan Áliy awılında bolıp, aymaq turǵınları menen ushırastı
4032
Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń eń shetki aymaqlarınıń biri bolǵan Moynaq rayonı Qızıljar awıl puqaralar jıyını, Áliy awılında bolıp, xalıqtıń turmıs sharayatın jaqsılaw baǵdarında ámelge asırılǵan qurılıs-ońlaw hám abadanlastırıw jumısları menen tanıstı hám aymaq turǵınları menen ushırastı.
Dáslep Joqarǵı Keńes Baslıǵı bir qansha taraw wákilleri hám nuranıylar menen birgelikte «Qızıljar» awıl puqaralar jıyınınıń jańa imaratın ashıp berdi hám máhálle imaratında jaratılǵan imkaniyatlar menen tanıstı.
Aytıp ótiw orınlı, APJ imaratında máhálle baslıǵı, orınbasarları, profilaktika inspektorı ushın arnawlı bólmeler ajıratılǵan bolıp, barlıq qolaylı sharayatlar jaratıp berilgen.
Sonday-aq, imaratqa tutas sociallıq obektler de jańadan qurıp pitkerilgen bolıp, máhálle nuranıyları ushın jazǵı hám qısqı dem alıw orınları, aymaq turǵınları ushın tigiw cexi, kompyuter xanası, ruwxıylıq bólmesi hám basqa da qolaylıqlar jaratılǵan.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev máhálle imaratınan orın alǵan májilisler zalında aymaq turǵınları menen ushırastı hám jaqınnan sáwbetlesti.
Ushırasıwda awıl puqaralar jıyını belsendileri, nuranıylar, sonday-aq, aymaqta alıp barılǵan keń kólemli abadanlastırıw jumıslarında belsendilik kórsetken taraw wákillerine Qaraqalpaqstan Respublikası Joqarǵı Keńesiniń «Húrmet jarlıǵı» hám baxalı sawǵalar tapsırıldı.
Aytıp ótiw orınlı, Áliy awılın hár tárepleme abadanlastırıw boyınsha kólemli jumıslar alıp barılǵan bolıp, jańadan kompleks APJ imaratı qurıp pitkerildi, balalar hám futbol maydanshası qurıldı, aymaq infrastrukturası jaqsılandı, ishki jollar, ishimlik suw hám elektr támiynatı mashqalaları sheshimin taptı, baǵ egilip, suwǵarıw-irrigaciya sistemaları ońlandı.
Bir sóz benen aytqanda awılda qayta ómir baslanıp, nuranıylar júzinde hám balalar kúlkisinde óz sáwlesin taptı.
Qaraqalpaqstan Respublikası Joqarǵı Keńesiniń Málimleme xızmeti