Ózbek tiline til biyligi berilgen kún múnásibeti menen bayram saltanatı bolıp ótti

Búgin Qaraqalpaq mámleketlik akademiyalıq muzıkalı teatrında 21-oktyabr Ózbek tili bayramı kúni múnásibeti menen “Qádiriń bálent bolsın, ana tilim” uranı asında bayram ilajı bolıp ótti. Ótkerilgen ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qutlıqladı. Atap ótilgenindey, mámleketlik tilimizge bolǵan húrmet – bul kóp milletli xalqımızdıń ruwxıy dúnyasın jáne de bayıtıwǵa, milliy qádiriyatlarımızdı qásterlep-saqlawǵa hámde olardı uluǵlawǵa degen ǵamxorlıqtıń kórinisi sanaladı.

Sońǵı jılları elimizde ózbek tiliniń mámleketlik til sıpatındaǵı abıray-mártebesin arttırıwǵa ayrıqsha itibar qaratılıp, bul baǵdarda keń kólemli jumıslar ámelge asırılmaqta. Húrmetli Prezidentimizdiń baslaması menen belgili oyshıl hám jazıwshılarımızdıń atları menen atalǵan dóretiwshilik mektepleriniń ashılǵanı, Áliysher Nawayı atındaǵı Tashkent mámleketlik ózbek tili hám ádebiyatı universitetiniń shólkemlestirilgeni kewillerde milliy maqtanısh sezimlerin oyatadı. Ásirese, bul baǵdarda ana tilimizdi tereń úyreniw, onı ilimiy tiykarlarda hár tárepleme rawajlandırıw hám qollanıw sheńberin keńeytiw, filolog kadrlardı tayarlaw ilajlarınıń jańa basqıshlarǵa kóterilgeni – bul elimizde mámleketlik tilge bolǵan ayrıqsha itibardıń kórinisi sanaladı. Sonday-aq, bul baǵdarda enciklopediya hám sózliklerdi, sabaqlıqlar menen oqıw qollanbaların baspadan shıǵarıw sıyaqlı iygilikli islerde ámelge asırılmaqta. Álbette, bul óz gezeginde mámleketlik tilimizdiń xalıqaralıq maydandaǵı abırayın jánede arttırıwda áhmiyetli orın tutpaqta. Sonı umıtpawımız tiyis, mámleketlik tildiń taza saqlanıwı – bul elimizdiń rawajlanıwın hámde xalqımızdıń keleshegin belgileydi. Ol ósip kiyatırǵan jaslardı ana-Watanımızǵa sadıqlıq ruwxında tárbiyalawda hám milliy úrp-ádet, salt-dástúrlerimizdi qásterlep-saqlawda áhmiyetli orın iyeleydi. Bunnan tısqarı, mámleketlik tildi saqlaw hár qıylı jat ideyalar biziń ideologiyamızǵa qáwip salıp atırǵan búgingidey globallasıw dáwirinde hár birimiz ushın xalqımız aldındaǵı perzentlik parızımız bolıp tabıladı. Bayram múnásibeti menen bir topar ózbek tili hám ádebiyatı páni muǵállimlerine estelik sawǵaları tapsırıldı.

Ilaj dawamında kórkem-óner sheberleri tárepinen bayram koncerti jıynalǵanlar názerine usınıldı.

Qaraqalpaqstan Respublikası Joqarǵı Keńesiniń Málimleme xızmeti