Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń turizm potencialın rawajlandırıwǵa arnalǵan májilis ótkerdi
2097
Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamız aymaǵında turizmdi rawajlandırıw hám bul baǵdarda alıp barılıp atırǵan jumıslar, tarawda ushırasıp atırǵan mashqalalarǵa arnalǵan májilis ótkerdi.
Búgingi kúnde barlıq tarawlar qatarında turizmdi rawajlandırıwǵa da ayrıqsha itibar qaratılıp atırǵan bolıp, bul baǵdarda keń kólemli jumıslar ámelge asırılmaqta. Bunı sonǵı jılları elimizge keliwshi turistler sanınıń birqansha artıwınan-aq bilsek boladı. Turizm ekonomikanıń áhmiyetli tarawları bolıp esaplanǵan transport, baylanıs, qurılıs hám awıl xojalıǵına óziniń kúshli tásirin tiygizedi.
Ótkerilgen májiliste turizm tarawın rawajlandırıw boyınsha ayırım ministrlik, mákeme hám kárxanalar tárepinen alıp barılıp atırǵan jumısları talap dárejesinde shólkemlestirilmegenligi atap ótilip, ayırım basshılardıń jumısı sınǵa alındı. Bunda turistlik marshruttı keńeytiw hám tur paketlerdi kóbeytiw maqsetinde turistlik kárxana hám tur-operatorları menen birge islesiwde tiyisli jumıslar alıp barılmaǵanlıǵı atap ótilip, tarawdı rawajlandırıw baǵdarında jol qoyılıp atırǵan qate-kemshiliklerge toktalıp ótildi.
Sonday-aq, mádeniy miyras obektlerin saqlap kalıw boyınsha restavraciya hám konservaciya jumısları nadurıs, yaǵnıy restavraciya qaǵıydaların saqlamaǵan halda alıp barılıp atırǵanlıǵı da sınǵa alınıp, juwapker mákemeler basshıları eskertildi.
Ótkerilgen májiliste turizm tarawın rawajlandırıw, elimizge turistler aǵımın keńirek tartıw, mádeniy miyras obektleriniń haqıyqıy (autentikalıq) kórinisin saqlap qalıw, milliy madeniyatımızdı úgit-násiyatlaw baǵdarında bar bolǵan mashqalalar haqqında sóz etilip, tiyisli taraw wákillerine anıq tapsırmalar belgilep berildi.
Qaraqalpaqstan Respublikası Joqarǵı Keńesiniń Málimleme xızmeti