Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taxtakópir rayonında boldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taxtakópir rayonın sociallıq-ekonomikalıq jaqtan rawajlandırıw, puqaralardıń abadan turmısın támiyinlew baǵdarında ámelge asırılıp atırǵan jumıslar menen tanısıw maqsetinde rayonda boldı. Dáslep Joqarǵı Keńes Baslıǵı rayondaǵı bir qatar qurılıs obektleri, sonıń ishinde “Qońıratkól” máhállesindegi 14-sanlı balalar baqshası imaratın hám “Ashıq byudjet” málimleme portalı arqalı jámiyetshilik pikiri tiykarında “Qaraoy” máhállesindegi “Mádeniyat orayı” imaratın ońlaw jumısların barıp kórdi. Qurılıs jumısların qadaǵalap barıw, belgilengen múddetten artqa qalıwlar ushın tiyisli sharalar kóriw hám qurılıslardıń sapalı etip juwmaqlanıwın qadaǵalaw ushın taraw wákillerine hám tiyisli uyımlarǵa tapsırmalar berdi.

Bunnan soń Qaraqalpaqstan Respublikası Joqarǵı Keńesiniń Baslıǵı barlıq ministrlik, komitet, basqarma, shólkem basshıları, sonday-aq, Taxtakópir rayonı mákeme, kárxana basshıları hámde rayon belsendileri qatnasıwında májilis ótkerdi.

Ótkerilgen májiliste Taxtakópir rayonın sociallıq-ekonomikalıq jaqtan rawajlandırıw, puqaralar turmıs abadanlıǵın támiyinlew baǵdarında alıp barılıp atırǵan jumıslar hám bul baǵdarda ayırım taraw wákilleri tárepinen jol qoyılıp atırǵan qáte-kemshilikler haqqında sóz etildi. Ótkerilgen májiliste puqaralardıń bántligin támiyinlew maqsetinde ajıratılǵan subsidiya qarjılarınıń talan-taraj etilgenligi, kredit qarjılarınıń maqsetsiz jumsalıwı, rayonlıq bank filialları hám hákim járdemshileriniń qarjılardı maqsetsiz jumsaw, ayırım fermer xojalıqları tárepinen ajıratılǵan kreditler naqlastırılıp jumsap jiberiliwi, qurılıs tarawındaǵı qosıp jazıw hám tajalan-taraj etiw jaǵdayları hám bilimlendiriw tarawındaǵı qáte-kemshilikler sınǵa alındı.

Sonday-aq, puqaralardıń múrájatları menen islesiw sektorlar kesiminde qanaatlandırarsız ekenligi, transport, medicina, bilimlendiriw, kadastr tarawlarındaǵı qáte-kemshilikler, mámleketlik baǵdarlamalardıń orınlanıwındaǵı artta qalıwlar da atap ótildi. Májiliste tarawlardaǵı kemshilikler hám nızam buzıwshılıq jaǵdayların saplastırıw boyınsha tiyisli taraw wákillerine tapsırmalar berildi.

Májilis juwmaǵında Qaraqalpaqstan Respublikası Joqarǵı Keńesiniń Baslıǵı Amanbay Orınbaev bıyılǵı jıl juwmaǵına shekem rayondı sociallıq-ekonomikalıq rawajlandırıw hám xalıqtıń abadan turmıs keshiriwin támiyinlew ushın jámi 9,9 mlrd. swmlıq qarjı ajıratılatuǵınlıǵın atap ótti.  

Qaraqalpaqstan Respublikası Joqarǵı Keńesiniń Málimleme xızmeti