Azanǵı saat 10:00 de baslanǵan qabıllaw túngi saat 23:00 ge shekem yaǵnıy, 13 saat dawam etti. Búgin Nókis qalasındaǵı Jaslar orayı imaratında Nókis qalası puqaraları ushın Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń jeke qabıllawı bolıp ótti.

Onda Ózbekstan Respublikası Prezidenti keńesgóyiniń birinshi orınbasarı U.Muxammadiev qatnastı. Bolıp ótken qabıllawda Joqarǵı Keńes Baslıǵınıń jeke qabıllawına jazılǵan dizim boyınsha puqaralardıń múrájatları tıńlanıp, ornında sheshim tabıw ilajları kórildi. Qabıllawda tiykarınan puqaralardı qıynap kiyatırǵan mashqalalar qatarında, sociallıq qollap-quwatlaw, isbilermenlik iskerliginde ushırasıp atırǵan mashqalalar, bántlik, medicinalıq járdem, elektr hám gaz támiynatı, jol, ishimlik hám aqaba suw jetkerip beriw boyınsha múrájatlar bildirildi.

Máselen, Qutlı mákan MPJ puqarası Aytımbetova Gulnazdıń úyiniń tóbesin bastırıp beriw boyınsha múrájatı unamlı sheshilip, jayınıń tóbesi bastırıp beriletuǵın boldı. Sonday-aq, Ámiwdárya mákan puqaralar jıyınında jasawshı Maqsetov Ernazar veb-programmalaw hám informaciyalıq texnologiya jónelisine qızıǵatuǵınlıǵın bildirip, ámeliy járdem soradı hám Joqarǵı Keńes Baslıǵı tárepinen qollap-quwatlanıp, kompyuter baǵdarlamaları hám sayt jaratıw menen shuǵıllanıwı ushın professional kompyuter alıp beriletuǵın boldı. Sonıń menen birge Aynazarova Guljaynanıń ekinshi qánigelik boyınsha kontrakt tólemi tólep berilip, jumısqa jaylastırıldı. Puqaralar Jumanazarova Aygúl hám Tólegenova Saltanattıń turaq jayın ońlawǵa qarjı ajıratılǵan bolsa, Madreymova Mayramgúlge materiallıq járdem pulı beriletuǵın boldı. Ulıwmalastırıp aytqanda, búgingi qabıllawda 300 den aslam múrájat kelip tústi hám onıń basım kópshiligi ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń «Hár bir múrájat artında bir insannıń huqıqı bar»-dep atap ótkenindey, puqaralardıń múrájatı barqulla itibarda boladı hám húrmetli Prezidentimizdiń baslaması menen «Insan qádiri ushın» principi tiykarında alıp barılıp atırǵan ámeliy jumıslar negizinde kóshpeli qabıllawlar barlıq rayonlarda dawam ettiriledi.

Qaraqalpaqstan Respublikası Joqarǵı Keńesiniń Málimleme xızmeti