Qaraqalpaqstan Respublikası Joqarǵı Keńesiniń Baslıǵı Amanbay Orınbaev jańadan qurıp pitkerilgen jol ótkizgishti ashıp berdi

Búgin xalıqaralıq áhmiyetke iye A-380 "Ǵuzar-Buxara-Nókis-Beynew" avtomobil jolınıń 761.1 km.de jaylasqan jol ótkizgishtiń ashılıwı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı. Ulıwma uzınlıǵı 1400 metr, eni 14.5, biyikligi 10 metr bolǵan jol ótkizgish qurılısı Qaraqalpaqstan Respublikası jollardan paydalanıw unitar kárxanası tárepinen alıp barılǵan bolıp, temir jol ústinen ótiwshi eki polosalı kópir paydalanıwǵa tapsırıldı.

Aytıp ótiw orınlı, ulıwma paydalanıwdaǵı xalıqaralıq áhmiyetke iye A-380 jolında jaylasqan jol ótkizgish respublikamızdıń qubla rayonları menen baylanıstırıwda áhmiyetli hám "Ǵuzar-Buxara-Nókis-Beynew" avtomobil jolı xalıqaralıq “E-40” avtomagistralınıń respublikamız aymaǵınan ótiwshi bir bólimi esaplanadı. Qaraqalpaqstan Respublikası Joqarǵı Keńesiniń Baslıǵı Amanbay Orınbaev jol salǵan, kópir qurǵan eń sawaplı islerdiń biri ekenligi, sonday-aq, jańadan qurıp pitkerilgen kópir hám usı magistral jol arqalı respublikamız aymaǵınan xalıqaralıq transport aǵımı hám júk tasılıwı keńeyiwine jol ashılatuǵınlıǵın atap ótti.

Qaraqalpaqstan Respublikası Joqarǵı Keńesiniń Málimleme xızmeti