Qaraqalpaqstan Respublikası Joqarǵı Keńesiniń Baslıǵı respublikamızdıń eń shetki aymaǵı bolǵan Qaraqalpaqstan posyolkası puqaraları menen ushırastı
2063
Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń eń shetki shegara aymaǵı bolǵan Qaraqalpaqstan posyolkası aymaǵındaǵı mektep, baqsha hám sport imaratında bolıp, aymaqta jaslarǵa tálim berip atırǵan ustazlar menen ushırastı hám olardıń sharayatları menen tanıstı. Sonıń menen birge mektep ushın kerekli bolǵan kompyuter toplamı, kitaplar, sport inventarları sawǵa etildi.
Bunnan soń Joqarǵı Keńes Baslıǵı Xalıqaralıq áhmiyetke iye A-380 "Ǵuzar-Buxara-Nókis-Beynew" avtomobil jolınıń 964-1204-km aralıǵındaǵı 240 km joldı rekonstrukciyalaw jumısları menen tanıstı.
Aziya rawajlanıw banki tárepinen qarjılandırılǵan obekt qurılısında Qıtay, Turkiya, Ázerbayjan mámleketleriniń bólip alıp islewshi kárxanaları avtomobil jolına cementobeton qaplamasın tósewi belgilenip, házirgi waqıtta qıtaylı qurılısshılarǵa tiyisli obektte cement qaplama tósew jumısları alıp barılmaqta.
Qaraqalpaqstan Respublikası Joqarǵı Keńesiniń Málimleme xızmeti