Qaraózek rayonınıń hákim orınbasarları intizamıy jazaǵa tartıldı
2834
Búgingi kúnde mámleketimizde keń kólemli reformalar alıp barılıp atırǵan bolıp, «Insan qádiri ushın» principi tiykarında respublikamızdıń barlıq orınlarında ámeliy jumıslar dawam etpekte. Bul baǵdarda aymaqlardıń infrastrukturasın jaqsılaw, social-ekonomikalıq jaqtan rawajlandırıw, xalıqtıń abadan turmısın támiyinlewge tiykar bolıwshı bir qansha tiyisli qarar hám pármanlar qabıl etilip atır. Usıǵan qaramay, ayırım basshılar tárepinen óz jumısına nemquraylıq penen qarawı sebepli qarar hám pármanlar, berilgen tapsırmalar orınlanbay qalıw jaǵdayları da ushırasıp atır.
Jaqında Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qaraózek rayonın social-ekonomikalıq jaqtan rawajlandırıw, xalıqtıń jasaw sharayatın jaqsılaw baǵdarında alıp barılıp atırǵan jumıslar menen tanısıw maqsetinde rayonda bolıp, Joqarǵı Keńes Baslıǵı tapsırmasına bola ótkerilgen úyreniwler nátiyjesi boyınsha rayon belsendileri hám tiyisli taraw basshıları qatnasıwında májilis ótkergen edi.
Májiliste ayırım taraw basshıları sınǵa alınıp, Ózbekstan Respublikası Prezidenti qararları, pármanlar, mámleketlik baǵdarlamalar, sonday-aq, Qaraqalpaqstan Respublikası Joqarǵı Keńesi tárepinen belgilep berilgen tapsırmalardıń orınlanıwın támiyinlewde jol qoyǵan qáte-kemshilikleri ushın qatań eskertildi hám intizamıy jaza sharası qollanıldı.
Sonnan, Qaraózek rayonı hákiminiń finans-ekonomika hám kámbaǵallıqtı qısqartıw máseleleri boyınsha birinshi orınbasarı – ekonomikalıq rawajlandırıw hám kámbaǵallıqtı qısqartıw bólimi baslıǵı Azerbaev Quanıshbay Koshkinbaevichke, Qaraózek rayonı hákiminiń qurılıs, kommunikaciyalar, kommunal xojalıǵı, ekologiya hám kóklemzarlastırıw máseleleri boyınsha orınbasarı Ametov Ǵayratdin Maxamatdinovichke hám Qaraózek rayonı hákiminiń jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı Kosıbaev Ilich Baltabaevichke Qaraqalpaqstan Respublikası Joqarǵı Keńesi Baslıǵınıń biyligi menen «Sógis» járiyalandı.
Qaraqalpaqstan Respublikası Joqarǵı Keńesiniń Málimleme xızmeti