Qaraqalpaqstan Respublikası Joqarǵı Keńesiniń Baslıǵı qubla ustirtte bolıp, awıl xalqı menen ushırastı

Elimizde barlıq reformalar insan qádiri hám onıń búgingi turmısınan razı bolıp jasawın támiyinlew ushın ámelge asırılmaqta. Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamızdıń barlıq aymaqlarında bolıp, puqaralar menen ushırasıwlar hám kóshpeli qabıllawlar ótkerip, olardıń mashqalaların sheshiw ilájların kórmekte. Joqarǵı Keńes Baslıǵı jaqında respublikamızdıń eń shetki shegara aymaǵı bolǵan Qaraqalpaqstan hám Jaslıq posyolkalarında bolıp, aymaq turǵınları ushın kóshpeli qabıllaw ótkergen edi. Búgin respublikamız basshısı Amanbay Orınbaev Qońırat rayonınan derlik 200 km qashıqlıqtaǵı Ustirt tegisligi ústinde jaylasqan Qubla Ustirt awılında bolıp, awıl turǵınları menen ushırastı.   Qubla Ustirt awılı gaz kompressor stanciyası átirapında jaylasqan bolıp, 200 den aslam puqara jasaydı.

Ushırasıw dawamında awıl turǵınları tárepinen bildirilgen múrájatlar hám olardıń tilek-ótinishleri unamlı sheshimin taptı. Máselen, Qubla Ustirt awılı ushın medicinalıq kórik shólkemlestiriw, awıl miyirbiykesi ushın qolaylı sharayatlar jaratıw maqsetinde ásbap-úskeneler menen támiyinlew hám aylıq miynet haqısına ústeme qosıw máselesi, awıldaǵı 23 baqsha jasındaǵı bala ushın bar bolǵan mektepke shekemgi bilimlendiriw shólkemi imaratın jańadan rekonstrukciyalaw hám tárbiyashı shtat birliklerin ashıp beriw menen birge awıl turǵınların jumıs penen támiyinlew, gaz esaplaǵıshların ornatıw, awılǵa alıp baratuǵın joldı ońlaw, mektep imaratın rekonstrukciyalaw, materiallıq járdem kórsetiw máseleleri sol orınnıń ózinde unamlı sheshilip, taraw juwapkerlerine qısqa múddette orınlaw boyınsha anıq tapsırmalar belgilep berildi. Bunıń nátiyjesinde jıllar dawamında qıynap kelgen máseleler boyınsha awıl xalqınıń múshkili jeńillenetuǵın boldı.

  Hesh bir múrájat itibardan shette qalmawı hám óz sheshimin tabıwı kerek. Húrmetli Prezidentimiz sózi menen aytqanda «Xalqımız erteń emes, uzaq keleshekte emes, áyne búgin óz turmısında unamlı ózgerisler kóriwdi qaleydi». Bugingi kúnde respublikamızda alıp barılıp atırǵan barlıq iygilikli isler hám baslamalar insanlardıń búgingi turmısınan razılıǵın támiyinlew jolında ámelge asırılıp atırǵan bolıp, bul jumıslar bunnan bılay da dawam etedi.  

Qaraqalpaqstan Respublikası Joqarǵı Keńesiniń Málimleme xızmeti