Íssıxana xojalıqlarınıń jumıs nátiyjeliligin arttırıw boyınsha qosımsha ilajlar haqqında Ózbekstan Respublikası Prezidentiniń qararı
2473
Mámleketimiz xalqına sapalı hám kepillikli awıl xojalıǵı ónimlerin jetkerip beriw arqalı azıq-awqat qáwipsizligin támiyinlew, ıssıxana xojalıqları hám muzlatqıshlı qoymaxanalardıń ekonomikalıq jaqtan nátiyjeli islewi ushın bunnan bılay da qolaylı sharayatlar jaratıw, sonday-aq, bul tarawda bánt bolǵan xalıqtıń dáramatların arttırıwdı qosımsha xoshametlew maqsetinde:
1. Íssıxana xojalıqlarında ónim jetistiriw hám tayar ónimdi ishki hám sırtqı bazarǵa baǵdarlawdıń sonday jańa mexanizmi engizilsin, oǵan muwapıq Baǵshılıq hám ıssıxana xojalıǵın rawajlandırıw agentligi:
ıssıxana xojalıqlarına tuqım, nál, mineral tógin hám basqa da materiallıq resurslardı jetkerip beriw hám jetistirilgen ónimdi olardan satıp alıw ilajların kóredi;
respublikada jumıs alıp barıp atırǵan tájiriybeli hám qánigeli agronom, entomolog, laboratoriya kadrların ıssıxana xojalıqlarına shártnama tiykarında usınıs etedi;
sertifikatlanǵan hám kepillengen tuqım hám nállerdi jetistiriw boyınsha arnawlı nálxanalardı shólkemlestiriwge járdemlesedi;
ıssıxana xojalıqları menen óz-ara birge islesiw tiykarında kooperaciyalıq jumıstı jolǵa qoyıw, jetistirilgen ónimdi sortlaw, qayta islew, saqlaw, qadaqlaw hám eksport etiwge járdemlesedi;
Ósimlikler karantini hám onı qorǵaw agentligi menen birgelikte kelisim tiykarında aymaqlıq inspektorlardı biriktiredi hám ósimliklerdi qorǵawdı shólkemlestiriw boyınsha xızmetler kórsetiliwin támiyinleydi.
2. Investiciyalar hám sırtqı sawda ministrligi, Oraylıq bank. Awıl xojalıǵı ministrligi jáne Qaraqalpaqstan Respublikası Ministrler Keńesi hám wálayatlar hákimlikleriniń tómendegi usınısları maqullansın:
a) xalıqaralıq finans institutları, maqsetli qorlar jáne Tikleniw hám rawajlanıw qorınıń qarjıları esabınan ıssıxana xojalıqları hám muzlatqıshlı qoymaxanalar ushın ajıratılǵan milliy hám sırt el valyutasındaǵı kreditlerdi qaytarıw múddetlerin ulıwma esapta 14 jıl etip belgilew hám jeńillikli dáwirdi 3 jıldan 5 jılǵa shekem sozıw (múddeti ótken tiykarǵı procent qarızdarlıqların kredit dáwirine teń muǵdarda sozıw). Onda, Isbilermenlik jumısın qollap-quwatlaw mámleketlik qorı tárepinen burın berilgen kepillik hám kredit procentleriniń kompensaciyaları saqlanıp qaladı.
Bul jeńillikler Íssıxana xojalıqlarınıń qarjı jaǵdayın jaqsılaw hám rawajlandırıw boyınsha respublikalıq jumısshı topardıń úyreniw nátiyjelerine bola qáliplestirilgen dizim tiykarında beriledi;
b) ıssıxana xojalıqların aylanba qarjı (tuqımlıq, nál, tógin, ximiyalıq qurallar, ıssıxana materialların satıp alıw hám ısıtıw qárejetleri ushın) menen támiyinlew ushın kommericiyalıq bankler tárepinen bir jıl múddetke altı aylıq jeńillikli dáwir menen kredit ajıratıw. Onda:
bul kreditler Ózbekstan Respublikası Prezidentiniń 2022-jıl 6-oktyabrdegi PQ-387-sanlı qararında názerde tutılǵan tártipte hám shártlerde Baǵshılıq hám ıssıxana xojalıǵın rawajlandırıw agentligine ajıratılǵan byudjet ssudası esabınan qarjılandırıladı;
ıssıxana xojalıqlarında eksportqa qolaylı ónim jetistiriwge talap etilgen aylanba qarjılar ushın sırt el valyutasındaǵı bank kreditleri Eksporttı qarjılandırıw agentliginiń qarjıları esabınan jıllıq 4 procent stavkada (sonnan, bank marjası 2 procent) ajıratıladı. Onda, kredit támiynatı sıpatında «Ózbekinvest» qamsızlandırıw kompaniyası qamsızlandırıw polisi qabıl etiledi hám qamsızlandırıw sıylıǵı qárejetleriniń 75 procenti Eksporttı xoshametlew agentliginiń qarjıları esabınan qaplap beriledi;
ajıratılǵan kreditlerdi qaytarıw múddetleri ıssıxanalarda zúráátti jıynap alıw hám satıw múddetlerine sáykeslendiriledi jáne kreditlerdi qaytarıw grafikleri sol tiykarda tastıyıqlanadı;
v) ıssıxana xojalıqlarına tábıyǵıy gaz boyınsha tólemdi óz waqtında ámelge asırmaǵanı ushın penya summası 2022-jıl 1-oktyabrden 2023-jıl 1-aprelge shekem, burınǵısınan basqasha tárizde, esaplanbaydı.
3. Investiciyalar hám sırtqı sawda ministrligi Oraylıq bank hám kommerciyalıq bankler menen birgelikte 15 kún múddet ishinde usı qarardıń 2-bántinde názerde tutılǵan milliy hám sırt el valyutasındaǵı kreditlerdiń belgilengen tártipte qayta rásmiylestiriliwin támiyinlesin.
4. Sonday tártip ornatılsın, oǵan bola:
a) ıssıxana xojalıqları ushın kommerciyalıq banklerge kredit hám olardıń procentin qaytarıw múddeti qatań túrde ónimniń pisip-jetiliwi dáwirine sáykeslendiriledi;
b) sanaat tipindegi zamanagóy ıssıxana hám logistika orayların shólkemlestiriw ushın bir pútin maydanlar birden-bir (aymaqta) «lot» penen aukcion sawdalarǵa shıǵarıladı. Onda, ajıratılatuǵın maydanlardıń kólemi aymaq sharayatınnan kelip shıǵıp, Qaraqalpaqstan Respublikası Ministrler Keńesiniń Baslıǵı hám wálayat hákimleri tárepinen belgilenedi.
5. 2022-2023-jıllarda ıssıxana xojalıqların injenerlik-kommunikaciya tarmaqları (ishimlik hám aqaba suwı, elektr energiyası hám irrigaciya tarmaqları) menen támiyinlew boyınsha mánzilli dizim 1-qosımshaǵa muwapıq tastıyıqlansın.
6. Qarjı ministrligi, Energetika ministrligi, Awıl xojalıǵı ministrligi, Suw xojalıǵı ministrligi Qaraqalpaqstan Respublikası Ministrler Keńesi hám wálayatlar hákimlikleri menen birgelikte bir ay múddette 2022-2023-jıllarda respublika boyınsha jumıs alıp barıp atırǵan hám jańadan shólkemlestiriletuǵın ıssıxanalar ushın elektr jetkerip beriw liniyaların qurıw, irrigaciya hám melioraciya tarmaqların tartıw baǵdarlamasın jáne ajıratılatuǵın byudjet qarjıları parametrlerin tastıyıqlasın. Onda, ajıratılatuǵın qarjılar kishi sanaat zonaları ushın názerde tutılǵan byudjet qarjıları sheńberinde kórip shıǵıladı.
Investiciyalar hám sırtqı sawda ministrligi Awıl xojalıǵı ministrligi jáne Ózbekstannıń sırt el mámleketlerindegi elshixanaları menen birgelikte:
bir ay múddette jeke sektordıń qatnasıwında dástúriy iri eksport bazarları aymaǵında miywe-ovoщlardı saqlaw, sortlaw hám qadaqlaw sıyaqlı kompleksli logistikalıq imkaniyatlarǵa iye bolǵan sawda komplekslerin shólkemlestiriw boyınsha usınıslardı Ministler Kabinetine kirgizsin;
sırtqı bazarlarda «aldınnan kútilmegen» hám salamat emes báseki aqıbetinde júzege keletuǵın qarjı shıǵınların, bárinen burın eksportqa júklenetuǵın ónimler boyınsha sırt elli sherikler menen dúziletuǵın uzaq múddetli sawda shártnamaları arqalı aldın alıw ilajların kórsin;
2022-jıldıń aqırına shekem Yaponiya, Koreya Respublikası, Evropa mámleketlerindegi jańa eksport bazarların ashıw boyınsha húkimetleraralıq kelisimlerge qol qoyılıwın támiyinlesin.
7. Monopoliyaǵa qarsı gúresiw komiteti hám Energetika ministrligi bir ay múddette aymaqlardaǵı ıssılıq elektr stanciyaları hám oraylarınan ıssılıq energiyasın alıp isleytuǵın ıssıxanalarǵa energiya jetkerip beriwde «jasalma» dáldalshılar payda bolıwı hám bahalardıń tiykarsız ósiwiniń aldın alıw ilajların kórsin.
8. Awıl xojalıǵı ministrligi Investiciyalar hám sırtqı sawda ministrligi menen birgelikte ıssıxanalarda jetistirilgen ónimlerdi bazarlarǵa jetkeriwdi keńeytiw maqsetinde xalıqaralıq finans institutlarınıń qarjıları esabınan agrologistika joybarların ámelge asırıwda júk avtomobillerin (suwıtqıshlı) satıp alıwdı qarjılandırıw ilajların kórsin.
9. Íssıxana xojalıqlarınıń finanslıq jaǵdayın jaqsılaw hám rawajlandırıw boyınsha respublikalıq jumısshı topardıń quramı (keyingi orınlarda – Respublikalıq jumısshı topar) 2-qosımshaǵa muwapıq tastıyıqlansın.
Respublikalıq jumısshı topar (A.Voitov):
Qaraqalpaqstan Respublikası Ministrler Keńesi, wálayat hákimlikleri, kommerciyalıq bankler menen birgelikte aymaqlardaǵı nátiyjesiz ıssıxana xojalıqların anıqlap, iyeleri menen kelise otırıp olardıń jańa baslamashılarǵa ótkerip beriliwin (aldı-sattı, kredit boyınsha bank aldındaǵı minnetlemelerin satıp alıw yamasa kelisilgen shártlerde) shólkemlestirsin;
eki ay múddette jer uchastkasına bolǵan iyelik huqıqın rásmiylestiriwde mashqalası bolǵan ıssıxana xojalıqların xatlawdan ótkerip, olardıń sheshimi boyınsha Awıl xojalıǵına mólsherlengen hám toǵay fondı iyeleriniń jer fondı kategoriyaların ózgertiw máselelerin kórip shıǵıw boyınsha Húkimetlik komissiyaǵa usınıs kirgizsin;
ıssıxana xojalıqlarınıń qarjı jaǵdayın jaqsılaw hám rawajlandırıw boyınsha turaqlı túrde usınıslar kirgizip barsın.
10. Ózbekstan Milliy teleradiokompaniyası, Ózbekstan Milliy málimleme agentligi ǵalaba xabar qurallarında ıssıxana xojalıqlarında intensiv usılda ónim jetistiriw, olardı ishki hám sırtqı bazarlarǵa jiberiw boyınsha unamlı tájiriybelerdi hár tárepleme sáwlelendirip barsın.
11. Awıl xojalıǵı ministrligi mápdar ministrlikler hám uyımlar menen birgelikte eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
12. Usı qarardıń orınlanıwın nátiyjeli shólkemlestiriwge juwapker hám jeke juwapker etip awıl xojalıǵı ministri A.B.Voitov hám qarjı ministri T.A.Ishmetov belgilensin.
Qarardıń orınlanıwın dodalap barıw, onıń orınlanıwı ushın juwapker uyımlardıń jumısın muwapıqlastırıw hám qadaǵalaw Bas ministrdiń orınbasarları Sh.M.Ǵanievke hám J.A.Xodjaevqa júklensin.
Ózbekstan Respublikası
Prezidenti Sh.MIRZIYOEV