Kásiplik awqamları tárepinen ótkerilgen tańlawdıń respublikamızdan eki jeńimpazı «Jentra» hám «Kobalt» avtomashinaları menen sıylıqlanadı

Ѳzbekstan Respublikası Prezidenti Shavkat Mirziyoevtiń basshılıǵında 2022-jıl 1-mart kúni Hayal-qızlardı hár tárepleme qollap-quwatlaw, olardıń jámiyettegi abıroyın jáne de bekkemlew boyınsha eń áhmiyetli wazıypalarǵa baǵıshlap ótkerilgen keńeytilgen videoselektor májilisinde belgilengen wazıypalardı orınlaw baǵdarında Ózbekstan kásiplik awqamları Federaciyası tárepinen keń kólemli jumıslar ámelge asırılmaqta. Atap aytqanda, hayal-qızlardıń mashqalaların turaqlı sheshiw, olardı sociallıq qollap-quwatlaw boyınsha Respublika komissiyası tárepinen xalıqtıń mashqalaların úyreniw hám olardı sheshiwge kómeklesiw, «Hayal-qızlar dápteri» sisteması nátiyjeliligin támiyinlew, bul baǵdarda jámiyetshiliktiń rolin arttırıw, puqaralardıń ózin-ózi basqarıw uyımları, wákillikli mákeme hám shólkemler menen birgelikte sociallıq sheriklikti bekkemlew, hayal-qızlardıń mashqalaların sheshiwde óziniń pidákerlik miyneti menen bárshege úlgi kórsetkenlerdi  múnásip xoshametlew maqsetinde «Eń jaqsı máhálle basshısı»,  «Eń jaqsı sektor basshısı», «Eń jaqsı hayal-qızlar belsendisi», «Eń jaqsı hákim járdemshisi», «Eń jaqsı jaslar jetekshisi» hám «Eń úlgili jumıs beriwshi hayal» respublika tańlawınıń jeńimpazları anıqlandı. Tańlawdıń Ózbekstan Respublikası basqıshında Qaraqalpaqstan Respublikasınan aymaqlıq basqısh jeńimpazları qatnasıp, «Eń jaqsı hayal-qızlar belsendisi» respublika tańlawında Beruniy rayonı “Qızılqala” awıl puqaralar jıyını  hayal-qızlar belsendisi Nurimbetova Nargiza Davletbaevna 1-orındı iyelep, «Jentra» avtomashinasın, «Eń jaqsı jaslar jetekshisi» respublika tańlawında Qońırat rayonı “Mıńjarǵan” mákan puqaralar jıyını jaslar jetekshisi Mambetyarova Ulbosın Musatdin qızı 2-orındı iyelep, «Kobalt» avtomashinasın jeńip alıwǵa miyasar boldı. «Eń jaqsı máhálle basshısı»,  «Eń jaqsı sektor basshısı», «Eń jaqsı hákim járdemshisi» hám «Eń úlgili jumıs beriwshi hayal» tańlawlarınıń Respublika basqıshı qatnasıwshılarınıń hár biri 30 million sumnan aqshalay sıylıqlanadı. Jeńimpazlardı sıylıqlaw máresimi 11-noyabr kásiplik awqamları kúni bayramı qarsańında bolıp ótedi.  

Qaraqalpaqstan xabar agentligi