Qaraqalpaqstan Respublikası Joqarǵı Keńesiniń Baslıǵı respublikamızdıń eń shetki aymaqlarınıń biri bolǵan Qostruba awılı turǵınları menen ushırastı

Mámleketimizde barlıq reformalar puqaralarımızdıń turmıs abadanlıǵın támiyinlew ushın ámelge asırılıp atırǵan bolsa «Insan qádiri ushın» principi tiykarında ámelge asırılıp atırǵan iygilikli isler usı reformalardıń turmısımızdaǵı sáwlesine aylanıp barmaqta. Usı tiykarda Qaraqalpaqstan Respublikası Joqarǵı Keńesiniń Baslıǵı Amanbay Orınbaev eń shetki shegara aymaqlardaǵı puqaralar menen ushırasıp, kóshpeli qabıllawlar ótkerip, puqaralardı qıynap kiyatırǵan mashqalalarǵa sheshim tabıw ilajların kórip atır. Búgin Joqarǵı Keńes Baslıǵı paytaxttan derlik 260 km, Taxtakópir rayonı orayınan 150 km qashıqlıqta jaylasqan Qostruba awılında boldı hám awıl turǵınları menen ushırastı.

  Ushırasıwda Qostruba awılı turǵınları tárepinen bildirilgen bir qansha múrájatlar óz sheshimin taptı. Sonnan, bildirilgen múrájatlar boyınsha awıl mektebin rekonstrukciyalaw, MPJ imáratın qurıp beriw, elektr energiyası menen támiyinlew maqsetinde quyash panellerin alıw ushın subsidiya ajıratıw boyınsha mashqalalar óz sheshimin tawıp, qısqa múddette orınlaw boyınsha juwapkerlerge tapsırmalar berildi.

Sonday-aq, awıldaǵı bar bolǵan 27 xojalıqtıń hár birine 2 gaz balonnan hám 1 gaz plitasınan beriletuǵın boldı. Sonıń menen birge, medicinalıq konteynerler ornatılıp, tez járdem mashinası ajıratıldı. Orta maǵlıwmatlı baslawısh klass qánigeligin tamamlaǵan 2 muǵallim jeńillikli túrde joqarı oqıw ornına qabıllanıwı belgilenip, kontrakt tóleminiń 50 payızı mámleket esabınan tólep beriletuǵın boldı. Qostrubalı mektep pitkeriwshileri joqarı oqıw orınlarına jeńilletilgen túrde qabıllanıwı, awıl mektebin inglis tili muǵallimi menen támiyinlew, puqaralardıń salamatlıǵın qorǵaw hám bekkemlew maqsetinde medicinalıq kórikten ótkeriwdi shólkemlestiriw, sharwa ushın zárúr bolǵan artezian qudıqların qazıp beriw, awılǵa alıp barıwshı jollardı jaqsılaw boyınsha tiyisli taraw basshılarına tapsırmalar berildi. Aytıp ótiw orınlı, Qostruba awılında búgingi kúnde 27 xojalıq jasaytuǵın bolıp, jergilikli turǵınlar tiykarınan sharwashılıq penen shuǵıllanadı. Sonday-aq, aymaqta qarakólshilik penen shuǵıllanıw da jolǵa qoyılǵan bolıp, «Baytóbet», «Alaw-1», «Jansayat-Sayan» sıyaqlı fermer xojalıqları tárepinen qarakól terisi ushın qoylar jetistiriledi. Xalıq iygiligi jolında ámelge asırılıp atırǵan jumıslar puqaralarımızdıń turmıs abadanlıǵın arttırıw, olardıń kúndelikli turmısında ushırasıp atırǵan mashqalalarǵa sheshim tabıw, eń baslısı búgingi kúninen razılıǵın támiyinlewge xızmet etedi hám bunday isler elede dawam eteri sózsiz.

Qaraqalpaqstan Respublikası Joqarǵı Keńesiniń Málimleme xızmeti