Qaraqalpaqstan Respublikası Joqarǵı Keńesiniń Baslıǵı respublikamızdıń eń shetki aymaqları bolǵan Shuqırqaq hám Qumbasqan awılları turǵınları menen ushırastı

Búgingi kúnde xalqımızdıń turmıs abadanlıǵın támiyinlew, olardıń jasaw sharayatın jaqsılaw baǵdarında aytarlıqtay jumıslar ámelge asırılıp atır. Baslı maqset, puqaralarımızdıń kúndelikli turmısınan razı etiw. Usı baǵdarda Qaraqalpaqstan Respublikası Joqarǵı Keńesiniń Baslıǵı Amanbay Orınbaev orınlarda kóshpeli qabıllawlar ótkerip, puqaralardı qıynap kiyatırǵan mashqalalarǵa sheshim tabıw ilajların kórip atır. Búgin Joqarǵı Keńes Baslıǵı paytaxttan derlik 230 km qashıqlıqta jaylasqan Shuqırqaq awılında boldı hám awıl turǵınları menen ushırastı. Ótkerilgen ushırasıwda Shuqırqaq awılı turǵınları tárepinen bildirilgen bir qansha múrájatları sheshimin taptı.

Sonnan, aymaqtaǵı ishki xojalıq jollarına qum-щeben aralaspasın tósew, puqaralar úylerine taza ishimlik suwın jetkerip beriw qurılmasın ońlaw, transport xızmetin jolǵa qoyıw, artezian qudıqların qazıp beriw, awıllıq shıpakerlik punktin elektr energiyası, yaǵnıy quyash paneli menen támiyinlew, shıpakerge aylıq ústeme tólemin jolǵa qoyıw, mektep pitkeriwshileriniń joqarı oqıw orınlarına jeńilletilgen túrde qabıllanıwın jolǵa qoyıw, quyash panellerin ornatıp beriw, qol telefon baylanısın jolǵa qoyıw, aymaq jaslarınıń shuǵıllanıwı ushın workout maydanshasın shólkemlestiriw, jumıssız puqaralardıń bántligin támiyinlew boyınsha bildirilgen múrájatlar sheshimin tabatuǵın boldı.

  Atap ótiw kerek, búgingi kúnde Shuqırqaq awıl puqaralar jıyınında 600 den aslam puqara jasaytuǵın bolıp, awıl turǵınları tiykarınan sharwashılıq penen shuǵıllanadı. 2002-jılda shólkemlestirilgen máhálle puqaralar jıyını jámi 6 xalıq jasaw punkti, sonnan Shuqırqaq, Nısan, Alpıs, Kempir truba, Baymurat hám Baydawlet punktlerinen ibarat. Kúnniń ekinshi yarımında Joqarǵı Keńes Baslıǵı Amanbay Orınbaev Tórtkúl rayonınıń Qumbasqan awılında bolıp, puqaralar menen ushırastı. Tiykarınan sharwashılıq penen shuǵıllanatuǵın Qumbasqan awıl puqaralar jıyınında 1500 den aslam puqara jasap atırǵan bolıp, awıl Tórtkúl rayonı orayınan 70 km den zıyat qashıqlıqta jaylasqan.

  Bolıp ótken ushırasıwda puqaralar tárepinen bir qansha múrájatlar bildirilip, kópshiligi sol orınnıń ózinde sheshimin tawıp, múrájatlar qanaatlandırıldı. Sonnan, puqaralar úylerine taza ishimlik suwın jetkerip beriw qurılmasın, ishki jollardı hám aymaqqa alıp barıwshı joldı ońlaw, elektr támiynatın jaqsılaw maqsetinde temirbeton baǵanalardı jańasına almastırıw, puqaralar úylerine kómir jetkerip beriw, awıldaǵı baqsha aldına jazǵı maydansha qurıp beriw, dárixana shólkemlestiriw, sport maydanshasın qurıp beriw, mektep imaratın tolıq ońlaw, transport xızmetin jolǵa qoyıw, artezian qudıqların qazıp beriw hám sociallıq qollap-quwatlaw boyınsha múrájatlar bildirilip, kópshiligi sol orınnıń ózinde sheshimin taptı. Waqıt talap etetuǵın múrájatlar boyınsha juwapkerlerge anıq tapsırmalar berilip, tez arada sheship beriletuǵınlıǵı bildirildi.

  Joqarǵı Keńes Baslıǵı Amanbay Orınbaev aymaqlarda puqaralardıń úylerine barıp, olardıń jasaw sharayatların óz kózi menen kórdi hám olardıń turmıs sharayatın jaqsılaw boyınsha wazıypalar belgilep alındı. Sonıń menen birge baqsha balalarına sawǵalar menen kiyim-kenshek, mekteplerge kitaplar, járdemge mútáj puqaralarǵa qımbat bahalı sawǵalar inám etildi. Búgingi kúnde ámelge asırılıp atırǵan barlıq reformalar hám ózgerisler puqaralarımızdıń turmıs abadanlıǵında óz sáwlesin tabıwı kerek hám bul ámelde shın mánisinde orınlanıp atır. Aymaqlarda puqaralarımızdıń turmıslıq mashqalalarına sheshim tabıw hám olardıń abadan turmısın támiyinlew jolındaǵı jumıslar elede dawam etedi. Qaraqalpaqstan Respublikası Joqarǵı Keńesiniń Baslıǵı Amanbay Orınbaev eń shetki aymaqlarda jasawshı turǵınlar menen ushırasıwdı hám olardan xabar alıwdı dawam etpekte.

   

Qaraqalpaqstan Respublikası Joqarǵı Keńesiniń Málimleme xızmeti