Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonında boldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonınıń social-ekonomikalıq jaǵdayı hám xalıqtıń turmıs sharayatın jaqsılaw jolında ámelge asırılıp atırǵan jumıslar menen tanısıw maqsetinde rayonda boldı. Dáslep Joqarǵı Keńes Baslıǵı rayondaǵı qurılıs jumısları juwmaqlanbaǵan obektlerdi barıp kórdi. Rayondaǵı 2 hám 4-sanlı balalar baqshalarınıń qurılıs jumısları belgilengen grafikten artta qalıp atırǵan bolıp, tapsırılıwı múddetinen ótip ketken. Joqarǵı Keńes Baslıǵı bul boyınsha qadaǵalawǵa alıw hám tiyisli sharalardı kóriw, sonday-aq, qurılıs jumısların jedellestiriw hám eń baslısı sapalı etip tapsırıw boyınsha juwapkerlerge tapsırmalar berdi.

Bunnan soń, Qaraqalpaqstan Respublikası Joqarǵı Keńesiniń Baslıǵı Amanbay Orınbaev Bozataw rayonınıń belsendileri, sonday-aq, barlıq ministrlik, shólkem hám rayonlıq mákeme basshıları qatnasıwında májilis ótkerdi.

Ótkerilgen májiliste xalıqtıń kúndelikli turmısında ushırasıp atırǵan mashqalalardı sheshiw, olardıń abadan turmısın támiyinlew jolında ámelge asırılıp atırǵan jumıslar hám bul baǵdardaǵı ayırım kemshilikler haqqında sóz etildi. Onda rayonda byudjet qarjılarınıń maqsetsiz jumsalıwı, ajıratılıp atırǵan jeńilletilgen kreditlerdiń hákim járdemshileri tárepinen mánzilsiz jumsalǵanlıǵı, qurılıs-ońlaw, abadanlastırıw jumıslarında ushırasıp atırǵan kemshilikler atap ótilip, bul baǵdarda tiyisli taraw wákilleri nemquraylıq penen qarap atırǵanlıǵı sınǵa alındı.

Bunnan tısqarı, byudjet qarjılarınıń jumsalıwında qosıp jazıwlar, jeńilletilgen kreditlerdiń biymaqset jumsalıwı, bilimlendiriw tarawındaǵı ayırım kemshilikler, investiciyalıq baǵdarlamalar hám Prezident saparı dawamında berilgen tapsırmalar tiykarında ámelge asırılıwı kerek bolǵan qurılıs-ońlaw jumıslarında artta qalıwshılıq jaǵdayları bar ekenligine ayrıqsha toqtaldı. Sonday-aq, májiliste anıqlanǵan kemshilikler boyınsha tiyisli taraw basshılarına tapsırmalar berilip, anıq mánzilli múddet ishinde saplastırıw wazıypası belgilep alındı.

  Bolıp ótken májilis sońında bıyılǵı jıl juwmaǵına shekem rayondı sociallıq-ekonomikalıq rawajlandırıw hám xalıqtıń abadan turmıs keshiriwin támiyinlew maqsetinde jámi 6 mlrd. 733,9 mln. swmlıq qarjı ajıratılatuǵınlıǵı atap ótildi.  

Qaraqalpaqstan Respublikası Joqarǵı Keńesiniń Málimleme xızmeti