Mámleketimizdiń barlıq aymaqlarında terek egiw máresimi bolıp ótti
1371
10-11-noyabr kúnleri Samarqand qalasında Ózbekstan Respublikası Prezidenti Shavkat Mirziyoev basshılıǵında Túrkiy mámleketler shólkemine aǵza mámleketler basshılarınıń májilisi bolıp ótiwi belgilengen bolıp, májilis sheńberinde bir qansha ilajlar ótkeriliwi rejelestirilgen edi.
Búgin túrkiy mámleketler jetekshileri Samarqandtaǵı Registan maydanı janındaǵı qıyabanda terek ekti. Terek egiw máresimi Ázerbayjan, Qazaqstan, Qırǵızstan, Túrkiya, Túrkmenstan hám Vengriya paytaxtlarında, sonday-aq, mámleketimizdiń barlıq aymaqlarında bolıp ótti.
Máresim, paytaxtımızdaǵı Nókis qalasında da bolıp ótip, onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Qaraqalpaqstan Respublikası Ministrler Keńesiniń Baslıǵı Q.Sariev qatnastı.
Sonday-aq, Ózbekstan Respublikası Oliy Majlis Senatı aǵzaları, deputatlar, ministrlik hám shólkem basshıları, keń jámiyetshilik wákilleri de qatnasıp, «Istiqlol» balalar dem alıw baǵındaǵı ajıratılǵan maydanǵa terek nállerin otırǵızdı.
Aytıp ótiw orınlı, Ózbekstan Respublikası Prezidenti Shavkat Mirziyoev basshılıǵında ótkerilgen májiliste mámleketimiz boyınsha «Jasıl mákan» ulıwma milliy joybarın ámelge asırıw ilajları kórip shıǵılıp, usı jıldıń 10-dekabr kúnine shekem terek egiw boyınsha «áhmiyetli 40 kúnlik» járiyalanǵan edi. Usıǵan tiykar Qaraqalpaqstan Respublikasınıń barlıq orınlarında da ulıwma milliy joybar sheńberinde jumıslar shólkemleskenlik penen dawam etpekte.
Bugingi bolıp ótken ilajda shın mánisinde «Jasıl mákan» ulıwma milliy joybarı sheńberinde ótkerilip atırǵan ilajlardıń dawamı boldı desek aljaspaǵan bolamız.
Qaraqalpaqstan Respublikası Joqarǵı Keńesiniń Málimleme xızmeti