Joqarǵı Keńes Baslıǵı tárepinen 15 lawazımlı shaxs iyelep turǵan lawazımınan azat etilip, 116 lawazımlı shaxsqa intizamıy jaza sharası qollanıldı
5629
Qaraqalpaqstan Respublikası Joqarǵı Keńesiniń Baslıǵı tárepinen mámleketlik baǵdarlamalar tiykarında belgilengen wazıypalardıń orınlanıwın támiyinlew hám xalıqtı qıynap kıyatırǵan mashqalalardı saplastırıw ilajları boyınsha búgingi kúnge shekem 11 rayonda májilis ótkerildi.
Bul májilislerdi ótkeriwden tiykarǵı maqset xalqımızdıń abadan turmısın támiyinlew hám bul baǵdarda óz wazıypasına nemquraylıq penen qarap kiyatırǵan ayırım basshılardıń óz lawazımına bolǵan juwapkershiligin arttırıw bolıp esaplanadı.
Aytıp ótiw orınlı, usı májilisler protokollarındaǵı tapsırmalar tiykarında mámleketlik baǵdarlamalar sheńberinde belgilep berilgen tapsırmalardı hám óz tarawları boyınsha júkletilgen wazıypalardı orınlawda bir qatar qáte-kemshiliklerge jol qoyıp, ózine bildirilgen isenimge nemquraylıq penen qaraǵanlıǵı ushın 15 lawazımlı shaxslar Qaraqalpaqstan Respublikası Joqarǵı Keńesiniń Baslıǵı tárepinen iyelep turǵan lawazımınan azat etildi. Sonıń menen birge 116 lawazımlı shaxslarǵa nızamshılıqta belgilengen tártipte intizamıy jaza sharaları qollanıldı.
Qaraqalpaqstan Respublikası Joqarǵı Keńesiniń Málimleme xızmeti