Ámiwdaryalı Malikaǵa Prezidentimiz sawǵası bolǵan 2 xanalı úy tapsırıldı
2544
Ózbekstan Respublikası Prezidenti Shavkat Mirziyoev tárepinen alıp barılıp atırǵan ádil siyasattıń nátiyjesinde kem támiyinlengen shańaraqlardı qollap-quwatlaw, olardı mámleket tárepinen ǵamxorlıqqa alıw boyınsha kóplegen ámeliy jumıslar alıp barılıp atır. Usılar qatarında baǵıwshısın joǵaltqan hám sociallıq qollap-quwatlawǵa mútáj shańaraqlardı úy-jay menen támiyinlew boyınsha da iygilikli, sonıń menen birge sawaplı isler dawam ettirilmekte.
Usınday sociallıq qollap-quwatlawǵa mútáj, baǵıwshısınan ayrılǵan shańaraqlardıń biri bolǵan Ámiwdárya rayonı Bayawıl MPJ turǵını Ahmedova Malikaǵa Qaraqalpaqstan Respublikası Joqarǵı Keńesiniń Baslıǵı Amanbay Orınbaev tárepinen Prezidentimiz sawǵası bolǵan 2 xanalı úy tapsırıldı.
Sonday-aq, eki perzenttiń anasınıń bántligin támiyinlew maqsetinde 43-sanlı mektepke shekemgi bilimlendiriw shólkemine jumısqa jaylastırıldı.
Álbette, ámelge asırılıp atırǵan bunday iygilikli isler elimizde «Insan qádiri ushın» principi tiykarında alıp barılıp atırǵan reformalardıń ayqın mısalı boladı desek asıra aytqan bolmaymız.
Qaraqalpaqstan Respublikası Joqarǵı Keńesiniń Málimleme xızmeti