Joqarǵı Keńes Baslıǵı respublikamızdıń eń shetki aymaǵı bolǵan Bostan elatlı punkti turǵınları menen ushırastı
2999
Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamız xalqınıń kúndelikli turmısında ushırasıp atırǵan mashqalalardı úyreniw hám olarǵa sheshim tabıw maqsetinde orınlarda jeke qabıllawların ótkerip kelmekte. Sonıń menen birge, alıs aymaq turǵınlarınıń da tilek-ótinishlerin tıńlaw, turmıs abadanlıǵın támiyinlew hám olardıń turmıslıq máselelerin sheshiw boyınsha da eń shetki aymaqlarǵa barıp, turǵınlar menen ushırasıp atır.
Búgin Qaraqalpaqstan Respublikası Joqarǵı Keńesiniń Baslıǵı respublikamızdıń eń shetki aymaǵı bolǵan Qaraqalpaqstan posyolka puqaralar jıyınına qaraslı, posyolka orayınan derlik 60 km uzaqlıqta jaylasqan Bostan xalıq jasaw punkti turǵınları menen ushırastı.
Onda puqaralar tárepinen bir qansha máseleler kóterilip, múrájatlar bildirildi. Bildirilgen múrájatlarda tiykarınan student jaslardıń kontrakt pulların tólep beriw, múddetli áskeriy xızmet tólemin ámelge asırıw, Tashkent qalasında emleniw ushın jollama alıw sıyaqlı mashqalalar orın alǵan bolıp, bul múrájatlar Joqarǵı Keńes Baslıǵı tárepinen sol orınnıń ózinde sheship berildi.
Sonday-aq, kóp balalı shańaraqlarǵa kir juwıw mashinası, gaz plita hám basqa da tutınıw buyımları sawǵa etildi. Aymaq turǵınlarınıń birgelikte bildirgen múrájatı tiykarında shańaraqlar Qońırat rayonı orayı, Qaraqalpaqstan hám Jaslıq posyolkalarına kóshirip ótkeriletuǵın boldı.
Xalqımızdıń razılıǵın támiyinlew, olardıń turmısında ushırasıp atırǵan mashqalalardı sheshiw jolındaǵı ámeliy jumıslar dawam etpekte.
Xalqımızdıń razılıǵın támiyinlew, olardıń turmısında ushırasıp atırǵan mashqalalardı sheshiw jolındaǵı ámeliy jumıslar dawam etpekte.
Qaraqalpaqstan Respublikası Joqarǵı Keńesiniń Málimleme xızmeti