Ózbek hám túrkmen xalıqları doslıǵı festivalınıń qatnasıwshılarına

Húrmetli festival qatnasıwshıları! Qádirli doslar! Bárinen burın, Túrkmensttanıń biytákirar Dashoguz qalasında ótip atırǵan búgingi doslıq festivalı joqarı dárejede shólkemlestirilgeni ushın Túrkmenstan Prezidenti húrmetli Serdar Gurbangulievich Berdimuhamedovqa hám barlıq shólkemlestiriwshilerge ózimniń tereń minnetdarshılıǵımdı bildiremen. Álbette, óz-ara tariyxıy-mádeniy baylanıslar ózbek hám túrkmen xalıqları arasındaǵı kóp ásirlik doslıqtıń bekkem tırnaq tası bolıp kelmekte. Haqıyqıy tuwısqanlıq hám jaqsı qońsıshılıq baylanısların jáne de kúsheytiwge qaratılǵan bul áhmiyetli ilaj bolsa millet hám xalıqlarımızdıń ulıwmalıq jaqsı maqsetleri hám arzıw-umtılısları uqsas ekenin jáne bir márte anıq tastıyıqlaydı. Keyingi jılları barlıq tiykarǵı tarawlarda mámleketlerimiz arasındaǵı birge islesiwdi rawajlandırıw baǵdarında úlken jumıslar ámelge asırılǵanın atap ótiw zárúr. Usı jerde Túrkmenstan Prezidenti húrmetli Serdar Berdimuhamedovtıń bıyıl iyul ayında Tashkentke ámelge asırǵan tariyxıy saparı strategiyalıq sherikligimizdi jáne de tereńlestiriwge úlken kúsh hám jedellik baǵıshlaǵanın ayrıqsha  atap ótpekshimen. Sonday-aq, kóp qırlı qatnasıqlarımızdıń joqarı isenim hám bir-birin qollap-quwatlaw ruwxında rawajlanıp barıwında Ullı mártbelei Mırza Túrkmenstan Milliy Keńesi Xalıq Másláháti baslıǵı húrmetli Gurbanguli Myalikulievich Berdimuhamedovtıń de misli kórilmegen úlesi bar ekenligin aytıp ótiwdi qáler edim.   Húrmetli ánjuman qatnasıwshıları! Tuwısqan xalıqlarımız arasında mádeniy-aǵartıwshılıq baylanıslar kún sayın jedellesip baratırǵanı, hár qıylı koncert hám festivallar, kórgizbeler shólkemlestirmekte, mádeniyat hám kino kúnleri ótkerilmekte, elimizde túrkmen milliy mádeniyat orayları jumıs islemekte. Jaqında Ózbekstan Jazıwshılar awqamı hám Ilimler akademiyası tárepinen tayarlanǵan 100 tomnan ibarat «Túrkiy ádebiyat dúrdanaları» atamasındaǵı shıǵarmalar kompleksiniń 10 tomı túrkmen ádebiyatı úlgilerine ajıratıldı. Bul toplamnan Ozodiy, Andalib, Maqtumqulı, Mullanafas, Berdi Kerbabaev, Xidir Deryaev, Atajan Twǵon sıyaqlı onlaǵan belgili klassikalıq hám zamanagóy shayır-jazıwshılardıń saylandı shıǵarmaları orın alǵanı ayrıqsha itibarlı. Sonday-aq, 2018-jılı Tashkent qalasınıń oraylıq kóshelerinen birine túrkmen xalqınıń ullı perzenti, oyshıl shayır, túrkmen ádebiyatınıń jarqın ǵayratkeri Maqtumqulınıń atı berilip, sulıw baǵ qurıldı, shayır kórinisi sáwlelengen barelef ornatıldı. Xorezm wálayatı Úrgensh rayonındaǵı «Túrkmenler» máhállesinde jaylasqan áyyemgi «Ullı háwli» estelik kompleksi qayta ońlanıp, paydalanıwǵa tapsırıldı. Paytaxtımız orayında qurılǵan «Ashxabad» parki mıńlaǵan watanlaslarımız hám paytaxtımızdıń miymanlarınıń súyikli ornına aylanıp úlgerdi. Túrkmenstanda jasap atırǵan ózbekler ushın ayrıqsha itibar kórsetip kelinbekte. Jaqında biytákirar Ashxabad qalasında qurılǵan záwlim «Tashkent» baǵı bolsa ózbek hám túrkmen xalıqlarınıń máńgi doslıǵınıń belgisi bolıp qaladı. Eki tuwısqan hám ázeliy dos ellerimizdiń kewillerin bir-birine tıǵız baylanıstıratuǵın bunday mádeniyat bayramları awızbirshiliktegi háreketlerimiz benen bunnan keyin de izbe-iz dawam etetuǵınına isenemen. Festivaldıń barlıq qatnasıwshılarına bekkem densawlıq, baxıt-ıǵbal hám iygilikli jumıslarında tabıslar tileymen.  

Shavkat MIRZIYoEV,

Ózbekstan Respublikası Prezidenti