Joqarǵı Keńes Baslıǵı puqaralar múrájatları menen islesiw máselelerine arnalǵan videoselektor májilisin ótkerdi

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev puqaralar múrájatları menen islesiw máselelerine arnalǵan videoselektor májilisin ótkerdi. Onda Qaraqalpaqstan Respublikası Joqarǵı Keńesi Baslıǵınıń Orınbasarı R.Saparbaev qatnastı. Ótkerilgen májiliste tiykarınan Prezident virtual qabıllawxanasına, Qaraqalpaqstan Respublikası Joqarǵı Keńesiniń telegram-botına kelip túsken múrájatlardıń analizi, hámde Xalıq qabıllawxanalarına kelip túsken múrájatlardıń orınlanıwı, qala hám rayonlarda ótkerilgen kóshpeli qabıllawlardıń nátiyjeleri, qala hám rayonlar 4 sektor basshıları tárepinen ótkerilip atırǵan kóshpeli qabıllaw jaǵdaylarınıń barısı sıyaqlı áhmiyetli máseleler qarap shıǵıldı. Májiliste barlıq ministrlik, mákeme, shólkem basshıları, qala hám rayon hákimleri, taraw wákilleri qatnastı. Búgingi kúnde Húrmetli Prezidentimiz basshılıǵında elimizde “Insan qádiri ushın” degen tiykarǵı princip tiykarında barlıq imkaniyatlar jaratılıp berilmekte. Bıraq, ayırım taraw hám sektor basshıları tárepinen puqaralardı qıynap kiyatırǵan mashqalalı máselelerdi unamlı sheshiw baǵdarında alıp barılıp atırǵan jumıslar qanaatlandırarsız jaǵdayda júrgizilip atırǵanlıǵı da sır emes. Sonnan, Joqarǵı Keńes telegram-botına kelip túsken múrájatlardı sheshiw baǵdarında alıp barılıp atırǵan jumıslar Tórtkúl, Xojeli, Taqıyatas, Beruniy rayonlarında durıs jolǵa qoyılmay atırǵanlıǵı sınǵa alındı. Usılar menen bir qatarda, hákimliklerdegi hámde ayırım ministrlik, mákemelerdegi juwaplı xızmetkerler tárepinen puqaralar múrájatlarına nemquraydılıq penen qarawı, ayırım jaǵdaylarda bilim dárejesi jeterli bolmaǵanlıǵı sebepli, tákirariy múrájatlardıń kóbeyip ketiwine sebep bolıp atırǵanlıǵı da atap ótildi.

Sonday-aq, ayırım sektor basshıları tárepinen puqaralardıń mashqalaların sheshiwde orınlarda ótkerilip atırǵan kóshpeli qabıllawlar ámelde kózabaǵa formasında ekenligi, yaǵnıy, qabıllawlarda puqaralardıń qatnası júdá tómenligi tilge alındı. Tarawlar kesiminde eń kóp múrájatlar úy jay menen támiyinlew máselesinde, sanaat, qurılıs, transport hám, kommunal tarawları, huqıq-qorǵaw uyımları máseleleri, bántlik, is haqı hámde shańaraǵına hám emleniwde materiallıq jaqtan járdem kórsetiw máselesinde múrájatlar kelip túskenligi aytıp ótildi. Joqarǵı Keńes Baslıǵı óz sózinde taraw basshıları, qala hám rayon hákimleri, sektor basshılarına puqaralar múrájatları menen islesiw baǵdarındaǵı jumıslardı qayta kórip shıǵıp, ámelde hár bir puqaranıń máselesi itibarǵa alınıwı kerekligi boyınsha qatań tapsırma berdi hám húrmetli Prezidentimizdiń “Insanlardıń dárt hám táshiwishlerin oylap jasaw - insanıylıqtıń eń joqarı ólshemi bolıp tabıladı” degen sózlerin hár bir basshı ózine súren etip alıw kerekligin ayrıqsha atap ótti.

Qaraqalpaqstan Respublikası Joqarǵı Keńesiniń Málimleme xızmeti