Joqarǵı Keńestiń Nızamlılıq, sud-huqıq hám korrupciyaǵa qarsı gúresiw máseleleri komitetiniń májilisi ótkerildi

Usı jıldıń 19-noyabr kúni Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetiniń májilisi ótkerildi. Májilisti Qaraqalpaqstan Respublikası Joqarǵı Keńesi komitet baslıǵı Z.Reymova kiris sóz benen ashıp berdi. Bunnan soń, Qaraqalpaqstan Respublikasındaǵı konstituciyalıq nızamlılıqtıń jaǵdayı hám komitet jumısların júrgiziw ámeliyatın ulıwmalastırıw nátiyjeleri haqqında Qaraqalpaqstan Respublikası Konstituciyalıq baqlaw komiteti baslıǵınıń málimlemesi, Qaraqalpaqstan Respublikası Bántlik hám miynet qatnasıqları ministrliginde korrupciyaǵa qarsı gúresiw boyınsha ámelge asırılǵan jumıslardıń orınlanıw barısı haqqında Bántlik hám miynet qatnasıqları ministriniń esabatı hám Qaraqalpaqstan Respublikası aymaǵında usı jıldıń 10 ayı dawamında júz bergen jol transport hádiyseleriniń sebeplerin úyreniw, analizlew hám olardıń aldın alıwǵa qaratılǵan ilajlar boyınsha aymaqlıq komissiyasınıń esabatı tıńlandı. Májiliske Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetine aǵza deputatları menen birge bir qatar tarawlardıń juwaplı xızmetkerleri sonday-aq, ǵalaba xabar quralları wákilleri qatnastı. Atap ótilgen máseleler boyınsha usınıslar berilip, bul jumıslar turaqlı túrde Joqarǵı Keńes tárepinen qatań qadaǵalawǵa alınıp, kórip shıǵılatuǵınlıǵı belgilendi. Sonıń menen birge «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń kún tártibindegi joybarı kórip shıǵıldı. Bunda Nızam joybarına muwapıq 9  Nızamǵa ózgeris hám qosımshalar kirgiziw názerde tutılıwı belgilenip, deputatlar tárepinen dodalandı. Májiliste kún tártibindegi máseleler tolıǵı menen qarap shıǵılıp, tiyisli sheshimler qabıl etildi.

Qaraqalpaqstan Respublikası Joqarǵı Keńesiniń Málimleme xızmeti