Ózbekstan Prezidentiniń Franciyaǵa rásmiy saparı baslandı

Franciya Respublikası Prezidenti Emmanuel Makronnıń mirát etiwine bola Ózbekstan Respublikası Prezidenti Shavkat Mirziyoev ómirlik joldası menen 21-noyabr kúni rásmiy sapar menen Parijge keldi. «Parij-Orli» aeroportında máleketimiz basshısınıń saparı múnásibeti menen eki mámleket bayraqları kóterildi, húrmetli qarawıl sap tarttı. Mámleketimiz jetekshisin Franciya mádeniyat ministri Rima Abdul-Malak hám basqa da rásmiy adamlar kútip aldı.

Sol kúni Ózbekstan Respublikası Prezidenti Shavkat Mirziyoev sapar etiw barısında Franciya rawajlanıw agentligi (FAR) bas direktorı Remi Riudi qabıl etti. Ózbekstan hám Franciya rawajlanıw agentligi arasındaǵı birge islesiwdi bunnan bılay da keńeytiw, jańa perspektivalı joybarlar menen bayıtıw máseleleri kórip shıǵıldı. Keyingi waqıtta óz-ara baylanıslarda joqarı dárejege erisilgeni qanaatlanıwshılıq penen atap ótildi. Birgeliktegi joybarlar portfeli 1 milliard evroǵa jetti. Agentliktiń qatnasıwında búgin infrastruktura, ekonomika tarmaqları hám sociallıq tarawdı rawajlandırıw boyınsha áhmiyetli baǵdarlamalar ámelge asırılmaqta. FAR basshısı búgingi kúnde Jańa Ózbekstanda ámelge asırılıp atırǵan reformalar baǵdarlamasınıń salmaqlı nátiyjelerin atap ótip, birge islesiwdiń búgingi jaǵdayın hám potencialın joqarı bahaladı.

Sáwbetlesiwde mámleketlik-jeke menshik sheriklik mexanizmlerdi, bárinen burın, bilimlendiriw, densawlıqtı saqlaw hám infrastrukturalıq tarawlarǵa engiziw, energetika hám trasportta «jasıl» ekonomikalıq joybarlardı keńeytiw, agrosanaat kompleksin qollap-quwatlaw, hayal-qızlar hám jaslardı oqıtıw hám olardıń isbilermenligin qarjılandırıwdı alǵa qoyıw sıyaqlı áhmiyetli baǵdarlarda ámeliy sheriklikti tereńlestiriw máselelerine ayrıqsha itibar qaratıldı. Joybarlardı aralas tárizde, sonıń ishinde, Franciya kompaniyalarınıń tikkeley investiciyalarınıń qatnasıwında qarjıldandırılǵan mexanizmlerden jedel paydalanıw zárúr ekeni atap ótildi.

Tárepler erisilgen barlıq kelisimlerdi ámelge asırıw boyınsha «jol kartası»n tayarlawǵa kelisip aldı. Ushırasıw juwmaǵında Ózbekstan Respublikası Húkimeti hám Franciya rawajlanıw agentligi arasında awıl xojalıǵı, energetika, «jasıl» ekonomika, qalalardı rawajlandırıw, suw támiynatı, bank-qarjı hám transport tarawlarında anıq joybarlardı ámelge asırıwdı názerde tutatuǵın ulıwma bahası 1 milliard evrodan zıyat bolǵan 2025-jılǵa shekem strategiyalıq birge islesiw baǵdarlamasına qol qoyıw máresimi bolıp ótti.

Bunnan soń Ózbekstan prezidenti usı mámlekettiń jetekshi kompaniyaları hám finans strukturalarınıń basshısı  menen ushırasıw ótkerdi. Ilajǵa «MEDEF» Franciya kárxanaları háreketi bas direktorı Fillipp Gote, «Airbus», «Orano», «Suez», «Alstom», «Total Eren», «EDF», «Schneider Electric», «Natixis» sıyaqlı 20 ǵa shamalas iri kompaniyalardıń basshıları qatnastı. Prezidentimiz ushırasıw qatnasıwshıların qutlıqlap, rásmiy sapar etiwdiń birinshi kúnindegi ilajlar isbilermenlik máselelerine baǵıshlanǵanına itibar qarattı. – Bul Ózbekstan áhmiyetli hám isenimli sherigimiz – Franciya menen ekonomikalıq birge islesiwdi keńeytiwge umtılısı qatań ekeninen jáne bir márte dárek beredi, – dedi mámleketimiz basshısı. Búgin Ózbekstanda sırt el investorlarına keń imkaniyatlar jaratılǵanı atap ótildi. Valyuta bazarı erkinlestirildi, paydanı repatriciyalawǵa barlıq sheklewler biykar etildi, bankler, iri sanaat hám infrastrukturalıq obektlerdi menshiklestiriw baǵdarlaması baslandı, mámleketlik-jeke menshik sheriklik mexanizmleri jedel engizilmekte. Jańa Ózbekstannıń rawajlanıw strategiyasına muwapıq isbilermenlikti bunnan bılay da xoshametlew, investorlardıń huqıqların qorǵaw, múlkke qol qatılmaslıqtı támiyinlew hám basqa da baǵdarlarda anıq ilajlar ámelge asırılmaqta. – Hár bir investor Ózbekstan degende, bárinen burın, turaqlılıq hám keleshekke isenimdi kóz aldına keltiriwi ushın umtılıp atırmız, – dedi Shavkat Mirziyoev. Dúnyadaǵı búgingi turaqsızlıq sharayatında máplerdi esapqa alıw hám óz-ara isenimge tiykarlanǵan kóp táreplemeli hám konstruktivlik sheriklikti tereńlestiriw barǵan sayın úlken áhmiyetke iye bolıp atırǵanı atap ótildi. Usı mánide, Franciya biznesiniń Ózbekstan bazarına shıǵıwı ushın úlken perspektivalar ashılmaqta. Mámleketimizdiń tartımlılıǵı Oraylıq Aziyada xalıqtıń sanı boyınsha eń iri mámleket ekeni, ónimlerimiz ǴMDAnıń úlken bazarına bajısız jetkerip beriletuǵını menen túsindiriledi. Ózbekstan franciyalı isbelirmenlerdi óndiris ushın zárúr infrastruktura menen támiyinlew, jeńillikler hám kepillengen satıp alıwlar kórinisinde qollap-quwatlaw hám basqa da járdem ilajların beriwge tayar ekeni atap ótildi. Prezident Shavkat Mirziyoev joqarı qosımsha qunlı ónimlerdi islep shıǵarıw quwatlıqların jaratıw, «jasıl» energetika, azıq-awqat sanaatı, ximiya hám avtomobil qurılısı, elektrotexnika jáne elektronika tarmaqları, densawlıqtı saqlaw tarawın uzaq múddetli hám óz-ara paydalı birge islesiw ushın perspektivalı baǵdarlar sıpatında atap ótti. Sheriklikti keńeytiw rejeleri boyınsha hár tárepleme pikir alısıldı. Franciya isbilermen toparlarınıń wákilleri óz sózlerinde Ózbekstanda ámelge asırılıp atırǵan ekonomikalıq reformalardı joqarı bahaladı. Mámleketimizde qaysı anıq joybarlardı ámelge asırıw niyetinde ekenin bildirdi. Franciya biznes delegaciyasınıń hár bir aǵzası menen sáwbetlesip, mámleketimiz basshısı isbilermenlerdi elimizge keliwge hám Ózbekstan investiciya kirgiziwge eń qolaylı orın ekenine isenim payda etiw ushın mirat etti. Ushırasıw juwmaǵında Ózbekstannıń juwapker basshılarına ilajda bildirilgen barlıq baslamalardı óz ishine alǵan jáne olardı ámelge asırıw mexanizmleri, anıq múddetleri hám orınlawshıları kórsetilgen Ámeliy ilajlar rejesin islep shıǵıw hám tastıyıqlaw tapsırıldı. Ózbekstan Respublikası Prezidenti Shavkat Mirziyoevtiń Franciyaǵa rásmiy saparı dawam etpekte.