Alıs aymaq turǵınlarınıń múrájatları unamlı sheshilip atır
1172
Jaqında ǵana Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat rayonınan derlik 200 km qashıqlıqtaǵı Ustirt tegisligi ústinde jaylasqan Qubla Ustirt awılında bolıp, awıl turǵınları menen ushırasqan edi.
Ushırasıwda aymaq turǵınları ushın medicinalıq kórik shólkemlestiriw, awıl miyirbiykesi ushın qolaylı sharayatlar jaratıw maqsetinde ásbap-úskeneler menen támiyinlew, bunnan tısqarı aymaqtı sımlı internet baylanısı menen támiyinlew sıyaqlı máseleler boyınsha Joqarǵı Keńes Baslıǵına múrájatlar bildirilgen edi.
Búgin, aymaq turǵınlarınıń múrájatları unamlı sheshilip, mashqalalar izbe-izlikte saplastırılmaqta.
Qaraqalpaqstan Respublikası Joqarǵı Keńesi Baslıǵınıń arnawlı tapsırması menen Joqarǵı Keńes, Den sawlıqtı saqlaw Ministrligi, rayon hákimligi hám basqada bir qatar taraw wákillerinen ibarat arnawlı isshi topar Qubla ustirt awılında boldı.
Dáslep, aymaqtıń Awıllıq shıpakerlik punkti zamanagóy ásbap-úskeneler menen támiyinlendi. Bunnan soń aymaq turǵınları tereńlestirilgen medicinalıq tekseriwden ótkerildi.
Sonıń menen birge, awıl xalqın internet baylanısı menen támiyinlew jumısları da baslap jiberildi.
Aymaq turǵınlarınıń Joqarǵı Keńes Baslıǵına etken múrájatlarınıń biri áyne usı internet tarmaǵına jalǵanıw edi.
Qońırat rayonlıq telekommunikaciya tarmaǵı tárepinen “Ústirt elatlı punkti (Qubla Ústúrt)” aymaǵına optikalıq kabel tartılıp, usı aymaqqa 96 abonentke mólsherlengen MSAN stanciyası ornatıldı.
Bul aymaqtaǵı ulıwma bilim beriw mektebi hám shańaraqlıq poliklinika filialları hám de usı aymaqtaǵı xojalıqlarǵada zamangóy internet xızmetin kórsetiw imkaniyatı jaratıldı.
Awıl turǵınlarınıń múrájatı tiykarında balalar baqshası imaratı tolıq rekonstrukciyadan shıǵarılıp, balalardı kabıllawǵa tayar halǵa keltirildi.
Álbette, bul jumıslardıń barlıǵı "Insan qádiri ushın" principi tiykarında ámelge asırılıp atırǵan iygilikli ámellerdiń jáne bir ayqın kórinisi.
Hár qanday múrájat itibarsız hám nátiyjesiz qalmaydı.
Qaraqalpaqstan Respublikası Joqarǵı Keńesiniń Málimleme xızmeti