Qaraqalpaqstan Respublikası Joqarǵı Keńesiniń Baslıǵı Amanbay Orınbaev Kegeyli rayonında boldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Kegeyli rayonınıń sociallıq-ekonomikalıq jaǵdayı hám xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen tanısıw maqsetinde Kegeyli rayonında boldı. Dáslep Joqarǵı Keńes Baslıǵı rayondaǵı Júzimbaǵ awıl puqaralar jıyını turǵını, 1-topar mayıbı Awezov Narbaydıń halınan xabar alıp, onıń jasaw sharayatı menen jaqınnan tanıstı. Qástege shıpa tilep, onıń úyi kózden ótkerildi. Rayon hákimine Awezov Narbaydıń mútájliklerin pitkeriw, oǵan hár tárepleme ǵamxorlıq kórsetiw, densawlıǵı, turaq-jayı menen baylanıslı mashqalalarǵa tolayım sheshim tabıw boyınsha tapsırma berip, bul jumıslardı jeke ózi qadaǵalawǵa alatuǵınlıǵın bildirdi.

Joqarǵı Keńes Baslıǵı rayondaǵı belgilengen múddetten ótip ketse de, ele qurılıs jumısları pitpegen obektlerge barıp kórdi. Sonnan, 69-sanlı Shańaraq poliknikası janındaǵı nawqaslar stacionar sharayatta emlenetuǵın 24 orınǵa arnalǵan rayonlıq medicina birlespesi filialı, Kegeyli rayonlıq medicina birlespesi imaratı, Aqtuba APJdaǵı 90 orınǵa arnap qurılıp atırǵan balalar baqshası hám Jaslar orayı imaratı qurılısı kózden ótkerildi.

Xalqabad posyolka puqaralar jıyınındaǵı shańaraq poliklinikasına tis emlew xanası ushın kerekli úskeneler, nawqaslar ushın 2 dana muzlatqısh beriletuǵın boldı. Sonıń menen birge poliklinikanı tolıq rekonstrukciyalaw ushın qarjı ajıratıldı. Joqarǵı Keńes Baslıǵı Amanbay Orınbaev Aqtuba APJdaǵı 90 orınǵa arnap qurılıp atırǵan balalar baqshası qurılısshısı menen ushırasıp, «Eger qurılıs óz múddetinde pitkerilgeninde 90 bala házir úyinde emes al, zamanagóy baqshada tárbiyalanıp atırǵan bolar edi» - dep atap ótti. Qurılıs jumısların sapalı túrde juwmaqlanıwın támiyinlew hám keshiktirilgen hár bir kún ushın jaza sharasın belgilew boyınsha tiyisli taraw wákillerine tapsırmalar berildi. Bunnan soń Joqarǵı Keńes Baslıǵı Kegeyli rayonı belsendileri, ministrlik hám shólkemler, rayonlıq mákeme basshıları qatnasıwında májilis ótkerdi.

Májiliste xalıqtıń razılıǵın támiyinlew, olardıń turmısında ushırasıp kiyatırǵan mashqalalarǵa sheshim tabıw, rayonnıń sociallıq-ekonomikalıq jaǵdayın jaqsılaw baǵdarında ámelge asırılıp atırǵan jumıslar, sonday-aq, bul baǵdardaǵı ayırım taraw basshıları tárepinen jol qoyılıp atırǵan kemshilikler haqqında sóz etildi. Rayonda alıp barılǵan úyreniw jumıslarında byudjetten ajıratılǵan qarjılar boyınsha finanslıq qáte-kemshiliklerge jol qoyılıp, maqsetsiz jumsalıw jaǵdayları, qurılıs tarawında ajıratılǵan qarjılardı talan-taraj etiw, qosıp jazıwlar, sonday-aq, belgilengen múddetten artta qalıw jaǵdayları kóp ushırasıp atırǵanlıǵı, hákim járdemshileri tárepinen jeńilletilgen kredit qarjıların maqsetsiz jumsaw jaǵdayları anıqlanǵan hám bul kemshilikler Joqarǵı Keńes Baslıǵı tárepinen sınǵa alındı.

Sonday-aq, sociallıq tarawda da bir qansha kemshilikler anıqlanǵan bolıp, mekteplerde oqıwshılardıń joqarı oqıw orınlarına kiriw kórsetkishi hám balalardı mektepke shekemgi bilimlendiriw mákemelerine qamtıp alıw dárejesiniń tómenligi, 3-8-9-sanlı mámleketlik balalar baqshalarında tawıq góshi, máyek, sok, sarı may hám basqa da bir qatar ónimler yaǵnıy, balalar nesiybesin talan-taraj etiw jaǵdayları, rayon aymaǵındaǵı mekteplerdiń baslanǵısh (1-4) klass oqıwshıların biypul azıq-awqatlıq ónimleri menen támiyinlew nátiyjeli shólkemlestirilmegenligi, puqaralar múrájatları menen islesiw qanaatlandırarlı jolǵa qoyılmaǵanı atap ótildi. Ótkerilgen májiliste anıqlanǵan qáte-kemshilikler hám nızambuzıwshılıq jaǵdayları boyınsha tiyisli taraw wákillerine qadaǵalawǵa alıw hám zárúr jaǵdayda qatań shara kóriw boyınsha anıq tapsırmalar berildi.

Joqarıda atap ótilgen úlken qáteliklerge jol qoyıp, óziniń xızmet wazıypasına hám bildirilgen isenimge nemquraydılıq penen qaraǵan rayon hákiminiń qurılıs, kommunikaciyalar, kommunal xojalıq, ekologiya hám kóklemzarlastırıw máseleleri boyınsha orınbasarı, rayonlıq xalıq bántligine kómeklesiw orayı baslıǵı, Hákim járdemshileri menen islesiw orayı baslıǵı iyelep turǵan lawazımınan bosatıldı. Rayon hákiminiń finans-ekonomika hám kámbaǵallıqtı qısqartıw máseleleri boyınsha birinshi orınbasarı, awıl xám suw xojalıǵı máseleleri boyınsha orınbasarı, xalıq bilimlendiriw bólimi baslıǵı intizamıy jazaǵa tartılıp, mektepke shekemgi bilimlendiriw bólimi baslıǵınıń lawazımına ılayıqlılıǵı máselesi kórip shıǵılatuǵın boldı. Sonday-ak, rayon hákiminiń orınbasarı - Investiciyalar hám sırtqı sawda bɵlimi baslıǵı jol qoyǵan kemshiliklerin saplastırıw boyınsha eskertildi. Sonıń menen birge Joqarǵı Keńes Baslıǵı Prezidentimiz tárepinen Qaraqalpaqstan Respublikası ushın qaratılıp atırǵan itibar nátiyjesinde respublikamızda alıp barılıp atırǵan iygilikli islerge de toqtalıp ótti. Ózbekstan Respublikası Prezidentiniń 408-sanlı qararı menen Qaraqalpaqstanda 2022-2023-jıllarda 252 máhállede jámi 259 obektte qurılıs-ońlaw jumısları ushın 293,7 mlrd.swmlıq qarjılar ajıratıltuǵınlıǵı, sonıń ishinde, tek ǵana Kegeyli rayonı boyınsha 12 proektte 6 mlrd. 922 mln.swmlıq ishimlik suw tarmaqların jańadan qurıw, ishki jollardı rekonstrukciyalaw jumısları alıp barılatuǵınlıǵın atap ótti. Majilis juwmaǵında jıl juwmaǵına shekem rayondı sociallıq-ekonomikalıq rawajlandırıw hám xalıqtıń abadan turmıs keshiriwin támiyinlewge jámi 12 mlrd 334,4 mln.swm muǵdarında qosımsha qarjı ajıratılatuǵınlıǵı aytıp ótildi.  

Qaraqalpaqstan Respublikası Joqarǵı Keńesiniń Málimleme xızmeti