Joqarǵı Keńes Baslıǵı «Jasıl mákan» akciyası sheńberinde terek egiwge qatnastı

Ózbekstan Respublikası Prezidenti Shavkat Mirziyoev mámleketimizde xalıq jasaw orınlarındaǵı jasıl maydanlar sanın kóbeytiw, terekler sanın arttırıw hám olardı tárbiyalaw maqsetinde «Jasıl mákan» akciyasın nátiyjeli shólkemlestiriwdi belgilep bergen edi. Álbette, egilgen hár bir terek hawadaǵı karbonat angidrid hám basqa da zıyanlı gazlardı jutıp, kislorod islep shıǵaradı hám biziń taza hawadan dem alıwımızǵa járdem beredi. Búgingi kúnde respublikamızdıń barlıq orınlarında «Jasıl mákan» akciyası sheńberindegi jumıslarǵa hámme birdey at salısıp, terek egiw jumısları shólkemleskenlik penen alıp barılıp atır. Qaraqalpaqstan Respublikası Joqarǵı Keńesiniń Baslıǵı Amanbay Orınbaev búgin Nókis qalası aymaǵında terek egiw mapazına barıp, jaqsı niyetler menen qala kórkine shıray baǵıshlawshı dekorativ terek nállerin ekti. Joqarǵı Keńes Baslıǵı hár bir insan átirap-aymaq hám atmosferanıń tazalıǵın, abadanlıǵın támiyinlew jolında terek egiw jumıslarında belsene qatnasıwı kerekligin atap ótti. Iygilikli baslamanı Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev dawam ettirdi.

Sonday-aq, áhmiyetli ilajda Qaraqalpaqstan Respublikası Joqarǵı Keńesiniń komitet baslıqları hám Joqarǵı Keńes xızmetkerleri miynet jámááti belsene qatnastı.

«Jasıl mákan» akciyası sheńberinde jumıslar elimiz boylap shólkemleskenlik penen elede dawam ettiriledi.  

Qaraqalpaqstan Respublikası Joqarǵı Keńesiniń Málimleme xızmeti