Kóp qırlı talant iyesine húrmet kórsetildi

12-sanlı balalar muzıka hám kórkem óner mektebinde  usı atamada Qaraqalpaqstan Kompozitorları awqamınıń baslıǵı, Ózbekstan hám Qaraqalpaqstanǵa miyneti sińgen kórkem óner ǵayratkeri Nájimatdin Muhammeddinovtıń 85 jıllıq yubiley keshesi bolıp ótti. Oǵan kompozitordıń shańaraq aǵzaları, kásiplesleri, keń jámiyetshilik wákilleri, shákirtleri, kórkem óner tarawı ǵayratkerleri, jazıwshı-shayırlar qatnastı. Ilajda Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov shıǵıp sóylep, professional muzıka mádeniyatın rawajlandırıwǵa úlken úles qosqan kompozitor N.Muhammeddinovtı 85 jıllıq yubileyi menen Qaraqalpaqstan Respublikası Joqarǵı Keńesi hám Ministrler Keńesiniń atınan qutlıqladı. Ilajda Qaraqalpaqstan Respublikası Mádeniyat ministri Q.Turdıev shıǵıp sóylep, kóp qırlı talant iyesiniń ómiri hám dóretiwshiligi boyınsha maǵlıwmat berdi. Atap ótilgenindey, N.Muhammeddinov Qaraqalpaqstan Respublikası Gimniniń, sonday-aq, qaraqalpaq xalqınıń tuńǵısh operasınıń, baletiniń hám simfoniyasınıń avtorı. Jáhán muzıkasında J.Verdi «Otello» operasın 80 jasında jazǵan bolsa, N.Muhammeddinov 82 jasında «Gúlayım» etno-operasın jazıwǵa miyassar boladı. Ol bir qansha juwapkershilikli mámleketlik wazıypalardı atqarıwına qaramastan, muzıka dúnyasın óziniń ómiriniń mazmunına aylandırdı. Talantlı, professional kompozitor jańa namalar dóretip, qaraqalpaq muzıka dúnyasında ózine tán mektep jarattı. Onıń dóretiwshiligindegi iri shıǵarmalardan I.Yusupovtıń librettosına jazılǵan «Ájiniyaz» operası, «Ayjamal» tuńǵısh baleti, N.Dáwqaraevtıń «Alpamıs» pessası, K.Raxmanovtıń «Toǵız tońqıldaq, bir shińkildek» komediyası, Qaraqalpaqstan kantatası, «Posqan el» simfoniyalıq poeması  tamashagóylerdiń kewlinen tereń orın aldı.  

N.Dáwqaraevtıń «Kól jaǵasında», «Nókis valsi», «Kewil kewilden suw isher», «Yar-yar», «Baqtım Ámiw jaǵası», «Ata mákanım» sıyaqlı qosıqları milliy muzıkamızǵa ǵáziyne bolıp qosıldı. Olardı eń talantlı qosıqshılar B.Matjanov, B.Nadırov, M.Xojaniyazov, G.Ayımbetova, R.Qutekeeva hám basqalar atqarıp shıǵıp, xalqımızdıń kewline yosh baǵıshladı. Xalıq namaların xalıq sazları orkestri, simfoniyalıq orkestr ushın aldıńǵıdan da bayıtıp, rawajlandırıp qayta isledi. Usınday tınımsız miynetleri, dóretiwshilik sheberligi názerden shette qalmay, N.Muhammeddinov Ózbekstan hám Qaraqalpaqstanǵa miyneti sińgen kórkem óner ǵayratkeri húrmetli ataqları berilip, «Hamza», Berdaq atındaǵı mámleketlik sıylıqlardıń laureatı boldı. Sonday-aq, ol «Mehnat shuhrati», «El-yurt hurmati» ordenleri menen sıylıqlandı. – Men dóretiwshi bolıp, usınday insan menen zamanlas bolǵanımnan quwanıshlıman. Onıń ariyaların, namaların, baletlerin jaslarǵa úyretip, keyingi áwladlarǵa jetkerip atırǵanımnan quwanıshlıman, -deydi Ózbekstan mámleketlik konservatoriyası Nókis filialınıń professorı, Ózbekstan kompozitorlar awqamınıń aǵzası, dirijyor H.Radjapov. –Filialımızda ustaz-shákirt dástúrin dawam ettirgen halda kompozitordıń shıǵarmaların jaslarımızǵa úyretiw baǵdarındaǵı dóretiwshilik jumıslar dawam ettirilmekte. Biz dóretiwshiler N.Muhammeddinovtan aldaǵı waqıtları da jańalıqlardı, jaqsı namalardı kútip qalamız. Ilaj dawamında N.Muhammeddinovtıń shıǵarmalarınan ibarat Ózbekstan mámleketlik konservatoriyası Nókis filialınıń xalıq sazları hám simfoniyalıq orkestri tárepinen koncert baǵdarlaması qoyıp berildi.