Ózbekstan Respublikası Prezidenti Sh.Mirziyoevtiń 2022-jıl 23-24-fevral kúnleri Qaraqalpaqstan Respublikasına saparı dawamında berilgen tapsırmalar tiykarında Tashkent wálayatı hákimligi Moynaq rayonına biriktirilip, rayondı social-ekonomikalıq rawajlandırıw ilajların ámelge asırıw, xalıqqa hár tárepleme ámeliy járdem kórsetiw maqsetinde jergilikli byudjettiń qosımsha qorları hám nızamshılıqqa tuwra keletuǵın basqa dárekler esabınan qarjılay járdem kórsetiw jumısları shólkemlestirildi. Usı tiykarda Tashkent wálayatı hákimi Z.Mirzaev basshılıǵında wálayat belsendileri hám tiyisli taraw wákilleri Qaraqalpaqstan Respublikasına kelip, Moynaq rayonında wálayat qáwenderliginde ámelge asırılǵan jumıslar menen tanıstı. Dáslep miymanlardı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kútip aldı. Bunnan soń, Joqarǵı Keńes Baslıǵı hám Tashkent wálayatı hákimi birgelikte Moynaq rayonı Qazaqdárya awılında orınlanǵan rejeler, sonıń ishinde sociallıq obektlerde ámelge asırılǵan jumıslardı barıp kórdi.

Bunnan soń Moynaq rayonındaǵı iske qosılǵan bir qatar obektler de kózden ótkerildi.

Sonday-aq, Qazaqdárya awılı aymaǵında shólkemlestirilgen sharwashılıq komleksi jumısları menen tanıstı.

Aytıp ótiw orınlı, Tashkent wálayatı hám Moynaq rayonı hákimlikleri menen birge 77 obekt boyınsha jámi 32 milliard sumlıq qurılıs-ońlaw hám úskeneler menen támiyinlew jumısların ámelge asırıw baǵdarında “Jol kartası” islep shıǵıldı. Sonday-aq, Xalıq deputatları Tashkent wálayatı Keńesiniń qararları hám wálayat hákiminiń tiyisli biylikleri tiykarında wálayat jergilikli byudjetinen usı ilajlar ushın jámi 16 mlrd. 500 mln sum qarjı ajıratılǵan. Sonnan, ulıwma bilim beriw mekteplerinde qurılıs-ońlaw hám úskeneler menen támiyinlew jumısların ámelge asırıw begilenip, “Qazaqdárya” APJdaǵı 15-sanlı mektep hám “Bozataw” APJ Qarajar awılındaǵı 9-sanlı mektep filialında kapital ońlaw jumısları alıp barıldı. Rayondaǵı barlıq mektepler tolıq sport inventarları menen támiyinlendi. Házirgi waqıtta “Úsh say” APJdaǵı 4-sanlı hám “Doslıq” MPJdaǵı 5-sanlı mekteplerdiń sport zalların qurıw jumısları dawam etpekte. Sonıń menen birge, Mektepke shekemgi bilimlendiriw mákemelerin qurıw, ońlaw hám úskeneler menen támiyinlew jumısları boyınsha da rejeler belgilenip, házirgi waqıtta “Bozataw” APJ “Qıpshaqdárya” awılındaǵı 50 orınlı MShBM qurılıs jumısları, “Tik ózek” APJdaǵı 12-sanlı MShBMnı kúndelikli ońlaw jumısları tolıq juwmaqlanıp, paydalanıwǵa tapsırıldı. Densawlıqtı saqlaw mákemeleri boyınsha da bir qatar jumıslar, sonnan, rayonlıq medicina birlespesine medicinalıq úskenelerin jetkerip beriw, Medicina birlespesiniń tez járdem bólimin qurıp pitkeriw, kem támiyinlengen shańaraqlar aǵzalarınıń medicinalıq operaciyaları ushın qarjı ajıratıw jumısların ámelge asırıw belgilenip, házirgi waqıtta bir qatar jumıslar orınlandı. Qurılıs, abadanlastırıw hám basqa máseleler ushın jol kartasına tiykar rayon orayı hám “Hákim ata” APJda kitap fondına bay kitapxana binyad etildi. Rayondaǵı barlıq MShBMlerine suw filtrlerin ornatıw, kóp xanalı turaq-jaylardı shiferlaw, hár bir máhállede futbol maydanshaların qurıw jumısları juwmaqlandı. “Qazaqdárya” APJda 4,5 km hám “Tik ózek” APJda 3 km ishki jollardı kúndelikli ońlaw jumısları orınlandı. Wálayat jergilikli byudjetiniń rezerv fondı qarjıları esabınan rayon orayında “Jaslar baǵı” shólkemlestirildi. Sonday-aq, isbilermenler tárepinen 2022-2023-jıllarda jańa jumıs orınların jaratıw maqsetinde bir qatar joybarlardı turmısqa engiziw belgilep alınǵan. Bir qatar shańaraqlar sociallıq jaqtan qollap-quwatlanıp, olarǵa xojalıq buyımları berildi. Sonıń menen birgelikte, Moynaq rayonı turǵınları salamatlıǵın bekkemlew maqsetinde Tashkent wálayatı sanatoriyasında emleniwin shólkemlestiriw, bir qatar sociallıq obektlerdi qurıp paydalanıwǵa tapsırıw, moynaqlı nawqaslardı medicinalıq emlew jumısları ámelge asırılıwı belgilengen. Húrmetli Prezidentimiz tárepinen belgilep berilgen tapsırmalarǵa tiykar, Qaraqalpaqstan Respublikası, sonıń ishinde Moynaq rayonı xalqınıń turmıs dárejesin jaqsılaw, jańa jumıs orınların jaratıw hám xalıqtıń dáramatın asırıw baǵdarındaǵı ámeliy jumıslar dawam etpekte.

Qaraqalpaqstan Respublikası Joqarǵı Keńesiniń Málimleme xızmeti