Xalıqtıń kúndelikli turmıs zárúrligi menen baylanıslı máselelerde ózi bolarlıqqa jol qoyıp bolmaydı
1156
Qaraqalpaqstan Respublikası Joqarǵı Keńesiniń Baslıǵı Amanbay Orınbaev jaqında Xojeli rayonında bolıp, rayonda mámleketlik baǵdarlamalardıń orınlanıwın támiyinlew, xalıqtıń jasaw sharayatın jaqsılaw, abadan turmıs ushın sharayat jaratıw, rayonnıń sociallıq-ekonomikalıq jaǵdayın kóteriw baǵdarında ámelge asırılıp atırǵan jumıslar, sonıń menen birge jol qoyılıp atırǵan qáte-kemshiliklerdi sınǵa alıp, onı qısqa múddette saplastırıw hám berilgen tapsırmalardı qadaǵalap barıw ushın Joqarǵı Keńestiń Nızamlılıq, sud-huqıq hám korrupciyaǵa qarsı gúresiw máseleleri boyınsha komiteti baslıǵı Z.Reymovanı Xojeli rayonına juwapker etip bekitken edi.
Belgilengen tapsırma tiykarında Joqarǵı Keńestiń komitet baslıǵı Z.Reymova "Kulab" APJ aymaǵındaǵı 90 orınlı balalar baqshası imáratı, 10-sanlı mekteptiń qosımsha imaratınıń qurılısı hám "Mustaqillik" APJ aymaǵındaǵı piyadalar jolınıń qurılıs-ońlaw jumısların barıp kórdi. Álbette xalıqtıń kúndelikli turmıs zárúrligi menen baylanıslı máselelerde ózi bolarǵa salıp bolmaydı. Qıstıń qırawlı kúnleri jetip kelmesten qurılıs jumısların sapalı túrde juwmaqlaw boyınsha berilgen tapsırmalardı buljıtpay orınlaw maqsetinde Joqarǵı Keńestiń komitet baslıǵı Z.Reymova qurılısshılar menen ushırasıp, qurılıstı qısqa múddette juwmaqlaw ushın zárúr bolǵan barlıq ilajlar kórilip, múddet belgilep alındı.
Sonıda ayrıqsha atap ótiw orınlı Xojeli rayonında anıqlanǵan kemshilikler boyınsha rayon hákiminiń qurılıs, kommunikaciyalar, kommunal xojalıq, ekologiya hám kóklemzarlastırıw máseleleri boyınsha orınbasarı, awıl xám suw xojalıǵı máseleleri boyınsha orınbasarı, rayon hákiminiń orınbasarı – Investiciyalar hám sırtqı sawda bɵlimi baslıǵı, jaslar siyasatı, sociallıq rawajlandırıw hám ruwxıy aǵartıwshılıq isleri boyınsha orınbasarları intizamıy jazaǵa tartılıp, Joqarǵı Keńes Baslıǵı tárepinen óz wazıypalarına juwapkershilik penen qaraw boyınsha eskertilgen edi.
Qaraqalpaqstan Respublikası Joqarǵı Keńesiniń Málimleme xızmeti