Adamlar erteń emes, búgin óz turmısınan kewilli jasawı kerek
991
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Beruniy rayonında bolıp, rayonda mámleketlik baǵdarlamalardıń orınlanıwın támiyinlew, xalıqtıń jasaw sharayatın jaqsılaw, abadan turmıs ushın sharayat jaratıw, rayonnıń sociallıq-ekonomikalıq jaǵdayın kóteriw baǵdarında ámelge asırılıp atırǵan jumıslar menen tanısıp, rayon belsendileri menen ótkerilgen ushısarsıwda kóshe biylerinen kelip túsken usınıslar hám mashqalalardı saplastırıw boyınsha juwapkerlerge tapsırmalar berilgen edi.
Usı tapsırmalardıń orınlanıwın qadaǵalaw boyınsha Joqarǵı Keńes Apparatınıń yuridikalıq bólimi baslıǵı A.Atajanovtı juwapker etip bekitildi.
Joqarǵı Keńesiniń Baslıǵı Amanbay Orınbaev Beruniy rayonında 15 mıń 677 kóshpes mulk obektleri elege shekem mámleketlik dizimnen ótpegenligi, sonnan hújjetleri bolsada 9 mıń 418 kóshpes múlk obektleri mámleketlik dizimnen ótpegenligin sınǵa alǵan edi. Bolıp ótken májlis juwmaǵı boyınsha tastıyıqlanǵan 33-sanlı bayanlamada berilgen tapsırmalardıń orınlanıwın támiyinlew maqsetinde «Insan qádiri ushın» principi tiykarında Kadastr agentligi Qaraqalpaqstan Respublikası basqarması, rayon hákimligi menen birgelikte «Tınıshlıq» APJ aymaǵında puqaralardıń turaq jaylarına kadastr hújjetin rásmiylestiriw jumısları ámelge asırılmaqta.
Bunda puqaralar ushın qolaylıqlar jaratıw maqsetinde kadastr agentligi bólimi, qurılıs bólimi, mámleketlik xızmetler orayı, rayonlıq arxiv hám bank xızmetkerleri qatnasında dúzilgen topar «Tınıshlıq» APJ aymaǵına barǵan halda kóshpeli xızmetler kórsetpekte.
Álbette, adamlar erteń emes, búgin óz turmısınan kewilli jasawı kerek. Elimizdegi alıp barılıp atırǵan barlıq reformalar, iygilikli ámeller usı princip tiykarında ámelge asırılmaqta.
Qaraqalpaqstan Respublikası Joqarǵı Keńesiniń Málimleme xızmeti