Qaraqalpaqstan Respublikası Joqarǵı Keńesiniń Baslıǵı Amanbay Orınbaev «Finlyandiya – Oraylıq Aziya» parlamentleraralıq doslıq toparı baslıǵı K.Kilyunen basshılıǵındaǵı Finlyandiya parlamenti delegaciyası qabılladı
901
«Finlyandiya – Oraylıq Aziya» parlamentleraralıq doslıq toparı baslıǵı K.Kilyunen basshılıǵındaǵı Finlyandiya parlamenti delegaciyası Ózbekstan Respublikasına bolǵan saparı sheńberinde búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qabıllawında boldı.
Onda Qaraqalpaqstan Respublikası Joqarǵı Keńesi Baslıǵınıń Orınbasarı R.Saparbaev qatnastı.
Qabıllawda Aral apatshılıǵı aqıbetlerin jumsartıw, Aralboyı aymaǵı xalqınıń salamatlıǵın bekkemlew hám bul baǵdarda búgingi kúnde ámelge asırılıp atırǵan jumıslar atap ótildi.
Aytıp ótiw kerek, Aral teńiziniń qurıwı biziń dáwirimizdiń eń úlken ekologiyalıq apatshılıqlarınıń biri boldı.
Sóylesiwlerde usı sıyaqlı bir qatar pikirler bildirilip, Ózbekstan Respublikası Prezidentiniń BMSh Bas Assambleyasınıń 72–sessiyasındaǵı shıǵıp sóylewinde dúnya jámiyetshiliginiń itibarı jáne bir márte Aral apatshılıǵına qaratılǵanı aytıp ótildi.
Sonday-aq, Joqarǵı Keńes Baslıǵı tárepinen Finlyandiya mámleketi, «Finlyandiya – Oraylıq Aziya» parlamentleraralıq doslıq toparı hám Qaraqalpaqstan Respublikası arasında óz-ara birge islesiwdiń jolǵa qoyılıwı oǵada áhmiyetli ekenligin hám barqulla birge islesiwge tayar ekenligin bildirdi.
Aral boyı aymaǵı ushın insan qáwipsizligi boyınsha kóp sheriklik trast fondı jergilikli xalıqtıń turmıs sharayatın jaqsılaw, aymaqtaǵı apatshılıq aqıbetlerin jumsartıw baǵdarında shólkemlestirilgen bolıp, fond qarjıları esabınan bir qansha unamlı jumıslar ámelge asırıldı.
Qaraqalpaqstan Respublikası Joqarǵı Keńesiniń Málimleme xızmeti