Xojeli rayonında keń kólemli abadanlastırıw jumısların alıp barıw boyınsha wazıypalar belgilep alındı

Húrmetli Prezidentimiz Basshılıǵında “Insan qádiri ushın” principi tiykarında xalıqtı qıynap kiyatırǵan mashqalalardı sheshiw, olarǵa múnásip turmıs sharayatların jaratıp beriw maqsetinde keń kólemli jumıslar alıp barılmaqta. Atap aytqanda, úy-jay, mektep, baqsha, medicina, mádeniyat, sport obektleri, ishki jollar, ishimlik suw, elektr, gaz támiynatı hám abadanlastırıw menen baylanıslı mashqalalardıń unamlı sheshimin tabıwda barlıq imkaniyatlar iske salınıp, bul baǵdardaǵı jumıslar dawam ettirilip atır. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında Xojeli rayonında keń kólemli abadanlastırıw jumısların alıp barıw boyınsha wazıypalardı belgilep alıw maqsetinde májilis ótkerildi. Onda Qaraqalpaqstan Respublikası Ministrler Keńesiniń Baslıǵı Q.Sariev qatnastı. Barlıq ministrlik, basqarma hám taraw basshıları, rayonlıq mákeme-shólkem basshıları qatnasıwında ótkerilgen májiliste wazıypalar belgilep alınıp, sektorlar kesiminde respublika mákemeleri hám rayon shólkemlerinen juwapkerler isshi toparlar dúzilgen halda biriktirildi. Aytıp ótiw orınlı, Xojeli rayonında puqaralardı qıynap kiyatırǵan mashqalalardı úyreniw, ekonomikalıq tarmaqlar hám sociallıq tarawlardı rawajlandırıw, infrastruktura obektlerin jaqsılaw maqsetinde hár bir máhálle menen óz aldına islesiw jolǵa qoyılmaqta. Bunda eń baslısı, xalqımızdı turmısınan kewilli jasawın támiyinlew bolıp esaplanadı.

Qaraqalpaqstan Respublikası Joqarǵı Keńesiniń Málimleme xızmeti