Balalarǵa barqulla mehir hám itibar kórsetiliwi kerek

Ózbekstan Respublikası Prezidenti Shavkat Mirziyoev «Xalıqaralıq mayıplıǵı bolǵan shaxslar kúni» múnásibeti menen jollaǵan múrájatında «Búgingi kúnde mámleketimizde insan qádiri, onıń xuqıq hám máplerin támiyinlew mámleket siyasatınıń baslı baǵdarı etip belgilengen. Bul proceste barlıq puqaralarımız sıyaqlı mayıplıǵı bolǵan watanlaslarımızǵa itibar hám ámeliy ǵamxorlıq kórsetiw, olardı hár tárepleme qollap-quwatlawǵa ayrıqsha áhmiyet qaratılıp atır.» dep atap ótken edi. Haqıyqatında da búgingi kúnde hesh bir insan itibar hám mehirden shette qalmawı kerek degen jaqsı niyet penen kóplegen ámeliy jumıslar alıp barılıp atır. Bul baǵdarda mayıplıǵı bolǵan, imkaniyatı sheklengen puqaralarǵa ǵamxorlıq kórsetiw, kewillerin kóteriw hám olardı hár tárepleme qollap quwatlaw baslı wazıypa sanaladı. Búgin «Xalıqaralıq mayıplıǵı bolǵan shaxslar kúni» múnásibeti menen 10-sanlı «Nurlı maskan» qánigelestirilgen mektep-internatında áhmiyetli ilaj bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, mektep-internatı tárbiyalanıwshıların sáne múnásibeti menen qutlıqladı hám elimizde hár bir insan hám hár bir bala itibardan shette qalmaytuǵınlıǵın, olarǵa bárháma ǵamxorlıq kórsetiletuǵınlıǵın atap ótti. Sonday-aq, mektep-internatı tárbiyalanıwshılarınıń zamanagóy hám sapalı bilim alıwları ushın zárúr bolǵan brayl displeyli zamanagóy kompyuterler, printer, elektron doska hám bir qansha bahalı sawǵalar tapsırıldı. Ótkerilgen ilaj mektep-internatı tárbiyalanıwshıları tárepinen tayarlanǵan koncert-baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti