Mámleketlik uyımlar hám shólkemler arasında korrupciyaǵa qarsı gúresiw boyınsha tańlawdıń jeńimpazları sıylıqlandı

Búgin Mámleketlik uyımlar hám shólkemler arasında korrupciyaǵa qarsı gúresiw boyınsha tańlawdıń jeńimpazları sıylıqlaw máresimi bolıp ótti. Onda Qaraqalpaqstan Respublikası Joqarǵı Keńesi Baslıǵınıń Orınbasarı R.Saparbaev qatnastı.

Jaqında Qaraqalpaqstan Respublikası Korrupciyaǵa qarsı gúresiw aymaqlıq keńesi baslıǵınıń baslaması menen Qaraqalpaqstan Respublikasındaǵı Mámleketlik uyımlar hám shólkemlerdıń korrupciyaǵa qarsı gúresiw hám komplaens-qadaǵalaw bólimi juwaplı xızmetkerleri arasında tańlaw járiyalanǵan edi. Tańlaw 3-basqıshtan ibarat bolıp, qatnasıwshılar 1-basqıshta tarawǵa baylanıslı nızamshılıq hújjetleri boyınsha test sorawları, 2-basqıshta oqıw ornında korrupciyaǵa qarsı gúresiw boyınsha komplaens sisteması hámde 3-basqıshta korrupciyanıń aldın alıw hám usı baǵdardaǵı nızamshılıq bazasın jetilistiriw boyınsha usınıslar islep shıǵıw shártleri boyınsha bellesti. Tańlaw juwmaǵı boyınsha Nurjanov Rasul Urazbaevich - Qaraqalpaqstan Respublikası Mámleketlik salıq basqarması jeke qáwipsizlik bólimi baslıǵı 1-orındı, Abdiev Ulugbek Fayzullaevich – Ɵzbekstan Respublikası Finans ministrligi janındaǵı Byudjetten tısqarı pensiya qorı Qaraqalpaqstan Respublikası basqarması Yuridikalıq byuro bas yuriskonsulti 2-orındı, Maxmudov Ilnur Faritovich - «Qaraqalpaq aymaqlıq elektr tarmaqları kárxanası» AJniń korrupciyaǵa qarsı gúresiw hám komplaens-qadaǵalaw bólimi baslıǵı   3-orındı jeńip aldı. Tańlaw juwmaǵı boyınsha jeńimpazlar hám belsene qatnasqan qatnasıwshılarǵa estelik hám bahalı sawǵalar tapsırıldı.  

Aytıp ótiw orınlı, tańlawdı ótkeriwden tiykarǵı maqset-Korrupciyaǵa qarsı gúresiw nátiyjeliligin hám mámleketlik uyım hám shólkemlerde komplaens qadaǵalawdı ámelge asırıwshı xızmetkerlerdiń juwapkershiligin asırıw hám xoshametlewden ibarat.

Qaraqalpaqstan Respublikası Joqarǵı Keńesiniń Málimleme xızmeti