Barlıq iygilikli ámeller xalqımız ushın

Búgingi kúnde xalqımızdıń turmıs sharayatların jaqsılaw, olardıń mashqalaların hár tárepleme úyreniw hám unamlı sheshim taptırıw boyınsha barlıq imkaniyatlar iske salınıp, xalıq iygiligi jolındaǵı jumıslar dawam ettirilmekte. Usı jıldıń 2-dekabr Joqarǵı Keńes Baslıǵı tárepinen barlıq ministrlik, basqarma hám taraw basshıları, rayonlıq mákeme-shólkem basshıları qatnasıwında ótkerilgen májiliste wazıypalar belgilep alınıp, sektorlar kesiminde respublika mákemeleri hám rayon shólkemlerinen juwapkerler isshi toparlar dúzilgen halda biriktirilgen edi. Usı tiykarda, Xojeli rayonı puqaraları menen jaqınnan sáwbetlesiw, olardıń tilek hám usınısların tıńlaw maqsetinde Ózbekstan Respublikası Prezidentiniń Qaraqalpaqstan Respublikasındaǵı xalıq qabıllawxanası baslıǵı S.Xudaybergenov, Qaraqalpaqstan Respublikası Joqarǵı Keńesi komiteti baslıǵı Z.Reymova, Mámleketlik xızmetlerdi rawajlandırıw agentligi Qaraqalpaqstan Respublikası filialı baslıǵı S.Daniyarov hám rayon hákimi J.Ermashevlar úyme-úy júrip puqaralar menen ushıraspaqta.

Máselen, Xojeli rayonı Samankól APJ, Taǵan awılı turǵını puqara Z.Imatovanıń múrájatı tiykarında eki kelini hám ózi, sonıń menen birge basqada tigiwshilik penen shuǵıllanıwdı qálewshi hayal-qızlar ushın aymaqtaǵı 36-sanlı mektep imaratınıń bos turǵan xanası ajıratılıp, zamanagóy “SINGER M 1505” markalı 10 dana tigiw mashinası menen támiyinlendi. Sonıń menen birge, Samankól APJ «Taǵan» awılı turǵını Taganova Xurliman múrájat etip, mobil dúkan menen támyinlense, azıq-awqat hám xojalıq buyımları sawdası menen shuǵıllanıp, dáramat tabıw niyeti bar ekenligin bildirdi. Bul múrájat ta unamlı sheshilip, 36-sanlı mektep janına mobil sawda dúkanı jaylastırıp berilip, paydalanıwǵa tapsırıldı. Álbette, hár bir bildirilgen múrájat itibarǵa alınıp, puqaralar turmısında ushırasıp atırǵan mashqalalarǵa unamlı sheshim tabıw jumısları turaqlı túrde alıp barıladı.

Qaraqalpaqstan Respublikası Joqarǵı Keńesiniń Málimleme xızmeti