Qayır-saqawat islew, mútájlerge járdem kórsetiw hám qollap-quwatlaw keńpeyil xalqımızǵa tán bolǵan joqarı pazıyletlerdiń biri

Búgingi kúnde elimizde «Insan qádiri ushın» principi tiykarında kóplegen jumıslar alıp barılmaqta. Sharayatı awır bolǵan, kem támiyinlengen puqaralardı izlep tabıw hám olardıń tiklenip alıwına barlıq járdemlerdi kórsetiw boyınsha húrmetli Prezidentimiz tárepinen anıq wazıypalar belgilep berilgen. Sharayatı awır shańaraq degende paxsa yamasa qam gerbishten qurılǵan shifersiz, polsız, sharayatı joq úylerde jasap atırǵan, qısta otın yamasa kómir ushın pul taba almay atırǵan, emleniwge, dári-dármaqqa, balasına ayaq kiyim alıp beriwge qárejeti joq, hátteki tuwılǵanlıq haqqındaǵı guwalıǵın yamasa puqaralıq pasportın alıwǵa qurbı jetpeytuǵın shańaraqlar, xojalıqlar túsiniledi. Bunnan tısqarı ijarama-ijara waqtınsha kún kórip júrgen úysizler, baspanasızlar da sharayatı awır xojalıqlarǵa kiredi. Bul awır sharayatta jasap atırǵan puqaralardıń turmısın jaqsılaw baǵdarında házirgi waqıtta Qaraqalpaqstan Respublikası Joqarǵı Keńesi Baslıǵı tárepinen iygilikli baslama kóterilip, barlıq rayonlardıń máhálle hám awıllarında shifersiz, polsız, oǵada tómen sharayatta bolǵan, jasaw turmısı ápiwayı talaplarǵa da juwap bermeytuǵın úyler tezlik penen úyrenip shıǵıldı. Usı tiykarda búgin Qaraqalpaqstan Respublikası Ministrler Keńesiniń májilisler zalında respublikamızdaǵı awır sharayatta jasap atırǵan puqaralardıń jasaw sharayatın jaqsılaw, olardıń turmıs abadanlıǵın támiyinlew maqsetinde májilis bolıp ótti. Onda Ózbekstan Respublikası Prezidentiniń keńesgóyi Tursınxan Xudaybergenov hám Qaraqalpaqstan Respublikası Ministrler Keńesiniń Baslıǵı Qahraman Sariev qatnastı.

Ótkerilgen májiliste májiliste respublikamız rayonlarındaǵı awır sharayatta jasap atırǵan xatlawdan ótkerilgen puqaralardıń turaq jayların ornına barıp kóriw, olarǵa ámeliy járdem kórsetiw, úylerin ońlap beriw baǵdarında jumıslardı nátiyjeli jolǵa qoyıw maqsetinde ministrlik, basqarma, mákeme-shólkem basshılarınan ibarat isshi toparlar dúzildi hám rayonlar biriktirip berildi.

Sharayatı awır bul shańaraqlarda jasap atırǵan puqaralardıń kimi jalǵız baslı, kimi baǵıwshısınan ayırılǵan, kimi kóp balalı, jáne basqaları mayıplıǵı bolǵan shaxslar bolıp, olarǵa búgingi kúnde járdem kórsetiliwi kerek. Eń baslısı bul shańaraqlardıń qıstıń qırawlı kúnlerinen aman alıp shıǵılıwın támyinlew, densawlıǵına qaraw hám báhár baslanıwı menen eń birinshi gezekte olardıń turaq jayların shiferlap hám pollap berip, turmıs mashaqatların jeńilletiw zárúr hám shárt.

Bir sóz benen aytqanda Qaraqalpaqstanda «Mehir háreketi» baslandı. Bul háreket arqalı Qaraqalpaqstanda birde bir járdemge mútáj shańaraq itibarsız qalmaydı.

Qaraqalpaqstan Respublikası Joqarǵı Keńesiniń Málimleme xızmeti