Jergilikli mámleketlik hákimiyat uyımlarınıń jumıs nátiyjeliligin arttırıw ilajları haqqında

Ózbekstan Respublikası Prezidentiniń pármanı

Mámleketimizde keyingi jıllarda xalıq deputatları jergilikli Keńeslerdiń aymaqlardı sociallıq-ekonomikalıq rawajlandırıw, xalıqtı sociallıq qorǵawǵa baylanıslı áhmiyetli máselelerdi sheshiw boyınsha wákillikleri keńeytilip, xalıq hákimiyatshılıǵın tolıq túrde ámelge asırıw baǵdarında keń kólemli reformalar ámelge asırıldı. Jergilikli Keńeslerdiń qadaǵalaw jumısın kúsheytiwge qaratılǵan huqıqıy tiykarlar jaratıldı. Jergilikli atqarıw hákimiyatı uyımlarınıń jumısı ústinen xalıq deputatları Keńesleriniń qadaǵalaw funkciyaların keńeytiw maqsetinde olarǵa onnan aslam qosımsha wákillikler berildi. Atap aytqanda, prokuratura, ádillik, ishki isler, qarjı, salıq, ekologiya hám densawlıqtı saqlaw uyımları basshılarınıń esap beretuǵını belgilep qoyıldı. Jańa redakciyadaǵı Ózbekstan Respublikası Konstituciyasına muwapıq jergilikli mámleketlik hákimiyattıń wákillikli hám atqarıw hákimiyatı uyımlarınıń wákillikleri, jergilikli Keńes baslıǵı hám hákim lawazımları bir-birinen ajıratılǵanı hákimiyatlardıń bóliniwine baylanıslı konstituciyalıq principtiń jergilikli dárejede orınlanıwın támiyinlewde áhmiyetli qádem boldı. Sonıń menen birge, «Ózbekstan – 2030» strategiyasında kórsetip ótilgen maqsetler jergilikli mámleketlik hákimiyattıń wákillik uyımların xalıqtıń haqıyqıy «dawısına» aylandırıw, jergilikli atqarıw uyımlarınıń jumısın transformaciyalap, aymaqlıq basqarıwdı «xalıq máplerine xızmet etiw» principi tiykarında jolǵa qoyıwdı talap etpekte. Jańa redakciyadaǵı Konstituciyada belgilengen hákimler hám xalıq deputatları Keńesleri wákillikleriniń bólistiriliwine tiykarlanǵan mámleketlik hákimiyattı shólkemlestiriwdiń jańa modelin tolıq ámelge asırıw, jergilikli Keńeslerdiń mámleketlik hám jámiyetlik basqarıwdaǵı rolin kúsheytiw, jergilikli mámleketlik hákimiyattı jańasha konstituciyalıq-huqıqıy sharayatlarda jolǵa qoyıw maqsetinde: Ózbekstan Respublikası Oliy Majlisi Senatı, Ádillik ministrligi hám xalıq deputatları jergilikli Keńesleri (keyingi orınlarda – jergilikli Keńesler) tárepinen islep shıǵılǵan: Jámiyetlik hám mámleketlik turmıstıń áhmiyetli máselelerin sheshiwde jergilikli mámleketlik hákimiyattıń wákillikli uyımlarınıń rolin arttırıw maqsetinde xalıq deputatları jergilikli Keńeslerine ótkeriletuǵını usınıs etilip atırǵan wákillikler dizimi 1-qosımshaǵa muwapıq; Xalıq deputatları jergilikli Keńesleriniń sistemalastırıw usınıs etilip atırǵan wákilligi menen funkciyaları 2-qosımshaǵa muwapıq; Jergilikli mámleketlik hákimiyat uyımlarınıń jumısın «Kúshli Keńes, esap beriw hám intaker hákim» principi tiykarında shólkemlestiriw boyınsha nızamshılıq hújjetlerin jetilistiriw boyınsha «jol kartası» 3-qosımshaǵa muwapıq maqullansın. jergilikli Keńeslerge wazıypa hám funkciyalar tek ǵana nızam hújjetleri menen júklenetuǵını; mámleketlik hákimiyat hám basqarıw uyımları tárepinen jergilikli Keńeslerdiń jumısına aralasıwǵa jol qoyılmaytuǵını; normativlik-huqıqıy hújjetler joybarların islep shıǵıwda wazıypalardı jergilikli mámleketlik hákimiyat uyımları hám atqarıw hákimiyatı uyımları arasında anıq belgilew ámeliyatı engiziletuǵını; normativlik-huqıqıy hújjetlerde jergilikli mámleketlik hákimiyat uyımlarına berilgen, jergilikli Keńeslerdiń nızamshılıqta belgilengen wákilliklerine tán bolmaǵan wazıypalardıń orınlanıwı boyınsha jergilikli atqarıw hákimiyatı uyımları juwapker esaplanatuǵını belgilep qoyılsın. Ózbekstan Respublikası Oliy Majlisi Senatına Ministrler Kabineti menen birgelikte 2024-jıldıń 1-oktyabrine shekem Ózbekstanda jergilikli mámleketlik hákimiyattıń wákillikli uyımlarınıń jumısın 2030-jılǵa shekem rawajlandırıw koncepciyasın islep shıǵıw hám onda tómendegi tiykarǵı baǵdarlardı názerde tutıw usınıs etilsin: jergilikli Keńesler, olardıń uyımları hám deputatlardıń qadaǵalaw jumısın jetilistiriw, nátiyjeli qadaǵalaw sistemasın qáliplestiriw; jergilikli Keńesler tárepinen aymaqtıń máplerine baylanıslı áhmiyetli hám aktual máseleler boyınsha Oliy Majlis Senatına usınıslar kirgiziw mexanizmin belgilew; jergilikli Keńeslerdiń norma dóretiwshiligi tarawındaǵı jumısın jetilistiriw; jergilikli Keńeslerdiń qararların islep shıǵıwda jámiyetshiliktiń keńnen qatnasıwın támiyinlew; jergilikli Keńesler deputatlarınıń statusı hám jumısınıń tiykarǵı kepilliklerin jáne de kúsheytiw; jergilikli Keńeslerdiń jumısında óz-ara hám xalıqaralıq birge islesiwdi jolǵa qoyıw; jergilikli Keńeslerdiń jumısın tolıq sanlastırıw, byurokratiyaǵa qarsı ilajlardı belgilew. Sırtqı isler ministrligi Ózbekstanda jergilikli mámleketlik hákimiyattıń wákillikli uyımlarınıń jumısın 2030-jılǵa shekem rawajlandırıw koncepciyasın islep shıǵıwǵa sırt mámleketlerdiń jetekshi ekspertlerin tartsın hám aldınǵı xalıqaralıq tájiriybeni úyreniw ushın xızmet hám oqıw saparların shólkemlestirsin. Ministrlikler hám uyımlar bir ay múddette usı Pármanǵa 3-qosımshaǵa muwapıq nızamshılıq hújjetleri menen jergilikli mámleketlik hákimiyat uyımlarına júklengen wazıypalar menen funkciyalardı jergilikli mámleketlik hákimiyattıń wákillikli uyımları hám atqarıw hákimiyatı uyımları arasında qánigelestiriw boyınsha usınıslardı Ádillik ministrligine kirgizsin. Ádillik ministrligi ministrlikler hám uyımlardıń usınısları tiykarında úsh ay múddette tiyisli nızamshılıq hújjetleri joybarların islep shıǵıp, Ministrler Kabinetine kirgizsin. Onda, usı joybardıń fizikalıq hám yuridikalıq tárepler ushın artıqsha hákimshilik hám basqa da sheklewlerdi engiziwshi qaǵıydalar menen normalardıń bar ekeni sın kózqarastan kórip shıǵılıwına ayrıqsha itibar qaratılsın. Ózbekstan Respublikası Oliy Majlisi palatalarına eki ay múddette jergilikli Keńeslerdiń jumısına baylanıslı óz qararların tolıq xatlawdan ótkergen halda sistemalastırıw usınıs etilsin. Ózbekstan Respublikası Oliy Majlisi Senatına: 2024-jıl 1-iyulǵa shekem jergilikli Keńeslerdiń wákillikleri, wazıypaları hám funkciyalarınıń reestrin islep shıǵıw hám júrgiziw; jergilikli Keńeslerdiń qarar joybarların islep shıǵıw hám qabıllawda birden-bir ámeliyattı engiziw boyınsha usınıslardı islep shıǵıw; Ádillik ministrligi menen birgelikte jergilikli Keńeslerdiń deputatları hám sekretariatları xızmetkerleriniń bilim jáne mamanlıǵın arttırıwǵa qaratılǵan oqıw kursların sistemalı shólkemlestiriw usınıs etilsin. Mámleketlik aktivlerdi basqarıw agentligi Qurılıs hám turaq jay kommunal xojalıǵı ministrligi hám Qaraqalpaqstan Respublikası Ministrler Keńesi, wálayatlar hám Tashkent qalalıq hákimlikleri menen birgelikte 2024-jıl 1-aprelge shekem: Jergilikli Keńesler imaratlarınıń házirgi jaǵdayın xatlawdan ótkersin; Ózbekstan Respublikası Oliy Majlisi Senatı menen birgelikte jergilikli Keńeslerdiń imaratlarına hám olardı materiallıq-texnikalıq jaqtan úskenelewge baylanıslı minimal talaplardı islep shıqsın; 2024-jıl 1-oktyabrge shekem xalıq deputatları wálayatlar hám Tashkent qalalıq Keńesleri, 2025-jıl 1-dekabrge shekem xalıq deputatları rayonlıq hám qalalıq Keńesleri ushın belgilengen minimal talaplardı esapqa alǵan halda imarat (jumısshı xanalar) penen támiyinlew hám úskenelew boyınsha «jol kartası»n islep shıqsın hám tastıyıqlaw ushın Ministrler Kabinetine kirgizsin. Ózbekstan Respublikası Prezidentiniń ayırım hújjetlerine 4-qosımshaǵa muwapıq ózgerisler kirgizilsin. Ádillik ministrligi mápdar ministrlikler hám uyımlar menen birgelikte eki ay múddette: Usı Pármannıń 1-2-qosımshalarında názerde tutılǵan usınıslardı ámelge asırıw maqsetinde tiyisli nızamshılıq hújjetlerin jetilistiriw haqqında; usı Pármannan kelip shıǵatuǵın basqa da ózgerisler hám qosımshalar haqqında Ministrler Kabinetine usınıslardı kirgizsin. Usı Pármannıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin. Ózbekstan Respublikası Prezidenti Sh.MIRZIYoEV Tashkent qalası, 2024-jıl 2-fevral