Ishki isler uyımları xızmetkerlerine hám veteranlarına
Húrmetli ishki isler sisteması xızmetkerleri!
Qádirli oficer hám generallar, serjant hám qatardaǵılar!
Húrmetli veteranlar!
Siz, ázizlerdi 25-oktyabr – Ózbekstan Respublikası ishki isler uyımları xızmetkerleri kúni menen qızǵın qutlıqlayman.
Bul qutlı áyyyamda, bárinen burın, Watan aldındaǵı muqaddes antıńızǵa bárqulla sadıq qalıp, elimizdiń tınıshlıǵı hám xalqımızdıń abadanlıǵı jolında ózińizge júklengen oǵada áhmiyetli wazıypalardı joqarı juwapkershilik penen orınlap kiyatırǵanıńızdı ayrıqsha atap ótiwdi qáler edim.
Keyingi jıllarda ishki isler uyımların haqıyqıy xalıqshıl strukturaǵa aylandırıw baǵdarında ámelge asırıp atırǵan keń kólemli reformalarımızdıń nátiyjesinde elimizde tınıshlıq-tatıwlıq ortalıǵın isenimli támiyinlew boyınsha bekkem tiykar jaratıldı.
2025-jılı “Hár bir máhállede huqıqbuzarlıqlardıń erte aldın alıw” barlıq dárejedegi basshılar ushın eń tiykarǵı wazıypa etip belgilendi. Usı maqsette jınayatlar júz beriw jaǵınan jaǵdayı awır bolǵan máhállelerge ishki isler uyımları menen birgelikte barlıq juwapker shólkemlerdiń basshıları hám huqıq qorǵaw sistemasındaǵı joqarı oqıw orınları biriktirilip, olardıń orınlardaǵı kúndelikli mánzilli jumısı hám qáwipsiz ortalıq jaratıwǵa qaratılǵan “birden-bir jumıs shınjırı” jaratıldı.
Bul kategoriyadaǵı máhálleler kishi aymaqlarǵa birlestirilip, olarda “operativ járdem” funkciyasın atqaratuǵın huqıq-qorǵaw orınları shólkemlestirildi, migrantlar hám jaslar menen islesiw boyınsha óz aldına shólkemlestiriwshilik-profilaktikalıq mexanizmler qáliplestirildi. Profilaktika, operativ-izlew, patrul-post, jol-patrul hám qorǵaw xızmeti inspektorlarınıń birgeliktegi jumısı jolǵa qoyılıp, olar “máhálle jetiligi” hám xalıq penen tıǵız birgelikte jumıs alıp barmaqta.
Elimizde alıp barılıp atırǵan ekonomikalıq reformalar, sociallıq baǵdarlamalar hám huqıqıy tártipti bekkemlew baǵdarındaǵı ilajlar nátiyjesinde jıl dawamında jámi máhállelerdiń yarımınan kóbireginde jınayat islenbedi, jaslar, hayal-qızlar hám jumıssızlar arasında jınayatshılıqtıń keskin azayıwına erisildi.
Óz gezeginde, tarawda zaman talaplarına sáykes túrde nátiyjelilikke erisiwge qaratılǵan jańasha jumıs islew ámeliyatı engizilmekte. Atap aytqanda, ishki isler uyımlarınıń sanlı infrastrukturasında transformaciya processleri baslandı, jámiyetlik qáwipsizlikti támiyinlew ámeliyatına jasalma intellekt imkaniyatları keńnen engizilmekte.
Qısqa múddette ministrlikler hám uyımlardıń qırqqa shamalas maǵlıwmatlar bazası menen integraciyalasqan “Qáwipsiz qala” birden-bir platforması jaratıldı, 20 dan aslam jańa málimleme sistemaları iske qosıldı, “Birden-bir migrant” málimleme bazası járdeminde uzaq waqıt sırt elde bolǵan shaxslar menen mánzilli islesiw sisteması jolǵa qoyıldı.
Dúnya kóleminde barǵan sayın kúsheyip atırǵan kiberjınayatlardıń qáwip-qáteri hám tásirinen mámleketimizdi isenimli qorǵaw, ásirese, xalqımızdıń olardan jábirleniwine jol qoymaw boyınsha kompleksli mexanizmler engizilmekte. Álbette, bul tarawda zamanagóy professional kadrlarǵa bolǵan talaptı arttırmaqta.
Usıǵan baylanıslı 2025-2026-oqıw jılınan baslap Ishki isler ministrligi Akademiyasında dual bilimlendiriw procesi hám innovaciyalıq pedagogikalıq texnologiyalar tiykarında “Sanlı texnologiyalar tarawında jınayatlarǵa qarsı gúresiw jumısı” baǵdarında maman kadrlar tayarlaw boyınsha jańa sistema jolǵa qoyılǵanı áhmiyetli qádem boldı.
Húrmetli taraw xızmetkerleri!
Jınayatlardıń erte aldın alıw, máhállelerde qáwipsiz ortalıq jaratıw arqalı xalqımızdıń turmısın jáne de tınısh hám bereketli etiwge qaratılǵan háreketlerimizdi biz bunnan bılay da tiykarǵı dárejede izbe-izlik penen dawam ettiremiz. Onda “máhálle jetiligi” imkaniyatlarınan nátiyjeli paydalanıw, shańaraq, bilimlendiriw mákemesi, máhálle belsendileri hám mámleketlik uyımlar arasında tıǵız birge islesiwdi támiyinlewge ayrıqsha itibar qaratıw zárúr.
Biz zaman talapların esapqa alıp, ishki isler uyımlarında jınayatshılıqqa qarsı gúresiw procesine sanlı texnologiyalardıń imkaniyatların keńnen engizgen halda shólkemlestiriw, kiberaldawshılıq hám kiberurlıqlarǵa shek qoyıw boyınsha jumıslardı jańasha kózqaraslar tiykarında jáne de jedellestiremiz.
Pútkil jer júzinde náshebentlik bálesi tiykarınan jas óspirimler hám jaslardı óz aǵımına tartıp atırǵanı hámmemizdi sergeklikke shaqırıwı zárúr. Bul illetten milliy genofondımızdı saqlaw maqsetinde shólkemlesken narkojınayatshılıqqa pútkilley shek qoyıw baǵdarındaǵı háreketlerimizdi jańa basqıshqa alıp shıǵıwımız, operativ-profilaktikalıq hám tergew jumısların mánzilli shólkemlestiriwimiz kerek.
Mine, usı tiykarǵı baǵdarlarda mobilizaciyanı kúsheytip, birgelikte háreket etip, jumısımızdıń nátiyjesin keskin arttırsaq, xalqımızdıń shın mánisindegi razılıǵına erisemiz, dep isenemen.
Áziz doslar!
Pursattan paydalanıp, siz, ázizlerge Watanımız hám xalqımızdıń tınıshlıǵı jolındaǵı sadıq hám pidákerlik xızmetińiz ushın shın júrekten minnetdarshılıq bildiremen.
Bul dańqlı áyyyamda el-jurt tınıshlıǵı jolında qaytıs bolǵan márt taraw xızmetkerlerin húrmet penen eske alıp, olardıń shańaraqları hám perzentlerine jaqsı tileklerimizdi jollaymız.
Ishki isler uyımları xızmetkerleriniń miynetin múnásip qádirlew, olardı materiallıq hám ruwxıy qollap-quwatlaw, zamanagóy jumıs sharayatları, zárúr texnikalıq qurallar menen támiyinlew, maman kadrlardı tayarlaw hám qayta tayarlaw máseleleri bárqulla itibarımız orayında bolıp qaladı.
Sizlerdi búgingi quwanıshlı bayram menen jáne bir márte qızǵın qutlıqlap, bársheńizge bekkem densawlıq, shańaraqlarıńızǵa tınıshlıq hám abadanlıq, juwapkershilikli jumısıńızda úlken tabıslar tileymen.
Shavkat Mirziyoev,
Ózbekstan Respublikası Prezidenti