Qaraqalpaqstanǵa grant qarjıların tartıw boyınsha sóylesiwler alıp barıldı

Italiyanıń Rim qalasında usı mámlekettiń abıroylı finanslıq institutı esaplanǵan «Cassa Depositi e Prestiti» (CDP) milliy rawajlanıw institutı bas shtab-kvartirasında rásmiy eki tárepleme ushırasıw shólkemlestirildi.

Onda Qaraqalpaqstan Respublikası Ministrler Keńesi janındaǵı Sırtqı biyǵárez kómek qarjıların (grantlardı) tartıw hám donorlar menen islesiw orayı direktorı K.Idirisov basshılıǵındaǵı delegaciya qatnastı.

Sóylesiwler CDP institutınıń Diplomatiyalıq baylanıslar hám xalıqaralıq tarmaqlar bólimi baslıǵı Jorja Prelaz hám Xalıqaralıq rawajlanıwdı qarjılandırıw departamentiniń bir qatar juwapker wákilleri menen alıp barıldı.

Onda Aralboyı regionında jasıl ekonomika, turaqlı rawajlanıw, awıl xojalıǵına zamanagóy innovaciyalardı engiziw hám ekologiyalıq jaǵdaydı jaqsılawǵa qaratılǵan perspektivalı joybar baslamaları usınılıp, keleshekte grant qarjıların tartıwdıń tiykarǵı baǵdarları belgilep alındı.