Italiyanıń Rim qalasındaǵı FAO bas shtab-kvartirasında Qaraqalpaqstannıń jer hám suw resursları boyınsha eki tárepleme sóylesiwler ótkerildi

Italiyanıń Rim qalasında jaylasqan BMShnıń Azıq-awqat hám awıl xojalıǵı shólkemi (FAO) bas shtab-kvartirasında rásmiy eki tárepleme ushırasıw bolıp ótti. Onda Qaraqalpaqstan Respublikası Ministrler Keńesi janındaǵı Sırtqı biyǵárez kómek qarjıların (grantlardı) tartıw hám donorlar menen islesiw orayı direktorı Kamalatdin Idirisov hám direktor orınbasarı Miratdin Paxratdinov qatnastı.

Sóylesiwler FAOnıń Jer hám suw resursları departamenti Geokeńislik maǵlıwmatları bólimi baslıǵı Liviya Peyzer hám juwapker wákili Feras Ziadat penen alıp barıldı. Ushırasıwda Qaraqalpaqstanda jer hám suw resursların turaqlı basqarıw hám tarawǵa zamanagóy texnologiyalardı engiziwge qaratılǵan joybar usınısları kórip shıǵılıp, keleshektegi birge islesiw baǵdarları belgilep alındı.