Taqıyatas rayonı kanalizaciya tarmaqların jańalaw jumıslarına start berildi

Búgin Taqıyatas rayonınıń kanalizaciya tarmaqların qurıw hám rekonstrukciyalaw jumıslarına start beriliwi múnásibeti menen saltanatlı ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı xalqımız turmısında áhmiyetli orın tutatuǵın waqıyalardan biri bolǵan jańa joybar baslanıwı múnásibeti menen qutlıqladı.

Atap ótilgenindey, húrmetli Prezidentimiz basshılıǵında elimizdiń barlıq aymaqları qatarında Taqıyatas rayonında da keń kólemli jumıslar ámelge asırılmaqta. Usı qatarda, bunnan derlik 70 jıl aldın qurılǵan 90 barak úy buzılıp, onda jasawshı puqaralar jańa turaq-jaylarǵa kѳshirildi. Bunnan tısqarı, usı jılı barlıq mámleketlik baǵdarlamalar tiykarında 52 sociallıq hám infrastruktura obektlerinde ulıwma bahası 316 mlrd. sumlıq qurılıs-ońlaw jumısların alıp barıw belgilengen.

Mine usınday iygilikli ilajlardıń dawamı sıpatında húrmetli Prezidentimizdiń tapsırması menen qabıl etilgen Ministrler Kabinetiniń 486-sanlı qararı tiykarında «Jáhán banki»niń 78 mln. dollar qarjıları esabınan Nókis qalası, Taqıyatas hám Xojeli rayonlarında 286 km kanalizaciya tarmaqları hám obektlerinde qurılıs jumısların alıp barıw názerde tutılǵan.

Búgin Taqıyatas rayonı kanalizaciya sistemasın jańalaw maqsetinde baslanıp atırǵan joybar sheńberinde 77,5 km kanalizaciya tarmaqları hám 6 dana nasos stanciyasınıń qurılıs jumısları alıp barılıwı rejelestirilgen. Bul joybardıń tolıq juwmaqlanıwı nátiyjesinde rayon xalqınıń kanalizaciya támiynatı házirgi 13 procentten – 42 procentke jetkeriledi. 

Sonday-aq, kanalizaciya tarmaqlarınan jıynalǵan suwlardı qayta islew arqalı texnikalıq hám xojalıq maqsetlerinde paydalanıw ushın jaramlı suwǵa aylandırıladı hám puqaralardıń qıytaq jerlerine jetkerip beriw jolǵa qoyıladı.