Qaraqalpaqstan Respublikası Joqarǵı Keńesiniń onınshı sessiyası haqqında málimleme
Usı jıldıń 6-aprel kúni Qaraqalpaqstan Respublikası Joqarǵı Keńesiniń onınshı sessiyası bolıp ótti. Sessiyaǵa Ózbekstan Respublikası Oliy Majlisi Senatı hám Húkimet aǵzaları, Respublika taraw basshıları, ǵalaba xabar quralları wákilleri, sonday-aq, Joqarǵı Keńestiń deputatları qatnastı.
Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı. Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı. Sessiya «Qaraqalpaqstan» telekanalı arqalı tuwrıdan-tuwrı efirde jarıtıp barıldı.
Kún tártibinde dáslep Qaraqalpaqstan Respublikasında barlıq tarawlarda alıp barılıp atırǵan reformalardıń barısın xalıqtıń arasında keńnen úgit-násiyatlaw tuwralı másele qarap shıǵıldı.
Onda Joqarǵı Keńes Baslıǵı sońǵı jıllarda húrmetli Prezidentimizdiń Qaraqalpaqstanǵa bolǵan ayrıqsha itibarı menen ámelge asırılǵan keń kólemli dóretiwshilik jumıslarǵa toqtaldı.
Bunnan soń, kún tártibindegi másele boyınsha Joqarǵı Keńestiń komitet baslıǵı Sh.Ótemisov bayanat jasadı hám elimizde ámelge asırılıp atırǵan dóretiwshilik jumıslar haqqında keń túrde atap ótti. Kún tártibindegi másele deputatlar tárepinen tolıq qarap shıǵıldı hám qarar qabıl etildi.
Bunnan soń puqaralardıń huqıqların qorǵaw, jınayatshılıqtıń aldın alıw hám jınayatshılıqqa qarsı gúresiw baǵdarında 2025-jılda ámelge asırılǵan jumıslar haqqında Qaraqalpaqstan Respublikası prokurorınıń málimlemesi tuwralı másele boyınsha Qaraqalpaqstan Respublikası prokurorı Sh.Aminov bayanat jasadı. Bul másele de deputatlar tárepinen tolıq qarap shıǵıldı hám qarar qabıl etildi.
Bunnan soń «Qalalıq jolawshılar transportı haqqında»ǵı Qaraqalpaqstan Respublikasınıń Nızamı hám tiyisli húkimetlik qararlar talaplarınıń orınlanıwı boyınsha Transport ministrligine jiberilgen Parlamentlik sorawınıń nátiyjesi tuwralı másele boyınsha Qaraqalpaqstan Respublikası Transport ministri wazıypasın waqtınsha atqarıwshı B.Seytmuratov shıǵıp sóyledi. Kún tártibindegi gezektegi másele qarap shıǵılıp, deputatlar tárepinen qarar qabıl etildi.
Sessiyada 2025-jılda orınlardaǵı norma dóretiwshiligi jumısı hámde huqıqtı qollanıw ámeliyatı, huqıqıy úgit-násiyat hám aǵartıwshılıqtıń jaǵdayı haqqında Qaraqalpaqstan Respublikası Ádillik ministriniń málimlemesi tuwralı másele boyınsha Ádillik ministri E.Tursunov bayanat jasadı. Bul másele de deputatlar tárepinen tolıq qarap shıǵıldı hám qarar qabıl etildi.
Kún tártibindegi keyingi másele, yaǵnıy, fizikalıq hám yuridikalıq shaxslardıń jer uchastkalarınan nızamsız paydalanıw hám de xızmetkerlerdiń arasında korrupciyanıń aldın alıwǵa qaratılǵan jumıslar boyınsha Kadastr agentligi Qaraqalpaqstan Respublikası basqarmasına jiberilgen Parlamentlik sorawınıń nátiyjesi tuwralı másele boyınsha Kadastr agentligi Qaraqalpaqstan Respublikası basqarması baslıǵı I.Tleuov bayanat jasadı. Másele tolıq qarap shıǵılıp, deputatlar tárepinen qarar qabıl etildi.
Kún tártibinde gezektegi Qaraqalpaqstan Respublikası Ekologiya hám klimat ózgeriwi komitetiniń 2025-jıl dawamında ámelge asırǵan jumısları haqqındaǵı Ekologiya hám klimat ózgeriwi komitetiniń esabatı tuwralı Ekologiya hám klimat ózgeriwi komiteti baslıǵı L.Seitova bayanat jasadı. Bul másele de tolıq qarap shıǵıldı hám deputatlar tárepinen qarar qabıl etildi.
Bunnan soń Oraylıq bank Qaraqalpaqstan Respublikası Bas basqarmasınıń 2025-jıl dawamında ámelge asırǵan jumısları haqqında Oraylıq bank Qaraqalpaqstan Respublikası Bas basqarması baslıǵı A.Isakov bayanat jasadı. Másele tolıq qarap shıǵılıp, deputatlar tárepinen qarar qabıl etildi.
Sessiya kún tártibinde ózbasımshalıq penen iyelep alınǵan jer uchastkasına bolǵan ijara huqıqı hámde olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi qarap shıǵıldı.
Ózbekstan Respublikasınıń arnawlı Nızamın basshılıqqa alıp, ózbasımshalıq penen iyelep alınǵan jer uchastkasına bolǵan ijara huqıqı jánede olarda qurılǵan imaratlar menen obektlerge bolǵan múlk huqıqı tán alınıp atırǵan 1793 puqaranıń dizimi sessiya qararı menen tastıyıqlandı.
Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele de tolıq qarap shıǵıldı. Bunnan soń deputatlar tárepinen arnawlı qarar qabıl etildi.
Usınıń menen Qaraqalpaqstan Respublikası Joqarǵı Keńesiniń onınshı sessiyası óz jumısın juwmaqladı.
