«Aqshakól ilhamları» respublika tańlawınıń ashılıw máresimi ótkerildi

Búgin Ellikqala rayonında «Aqshakól ilhamları» respublika tańlawınıń ashılıwına arnalǵan saltanatlı ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı tańlawdıń ashılıwı múnásibeti menen qutlıqladı.

Sońǵı jılları elimizde húrmetli Prezidentimizdiń basshılıǵında barlıq tarawlarda keń kólemli reformalar ámelge asırılmaqta. Ásirese, Qaraqalpaqstan ushın óz aldına qabıl etilgen qarar hám pármanlar xalqımızdıń abadan turmısın támiyinlewde bekkem tiykar bolıp xızmet etpekte. Usı qatarda, jaslardı hár tárepleme qollap-quwatlaw mámleketlik siyasattıń baslı baǵdarlarınıń birine aylandı.

Búgingi baslanıp atırǵan tańlaw da óz náwbetinde, jaslarǵa tiyisli reformalardıń nátiyjeliligin arttırıw, olardıń qızıǵıwshılıǵı hám uqıbın júzege shıǵarıwda áhmiyetli sanaladı.

Sonday-aq, jaslar arasında doslıq qatnasıqların bekkemlewde hám óz-ara tájiriybe almasıwı ushın qolaylı dóretiwshilik maydandı jaratıwda, jańa talantlardı keń jámiyetshilikke tanıstırıwda ayrıqsha orın iyeleydi.

Ótkerilgen ilaj dawamında tańlawdı shólkemlestiriwde belsendilik kórsetip atırǵan bir topar pidayı insanlarǵa Joqarǵı Keńestiń «Minnetdarshılıq xatı» tapsırıldı.

Ilaj kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.